talpinâ
tal|pi|nâ
[AF]
-
v.intr.
cjaminâ, lâ a pît, soredut a dilunc, cun pas svelt o cun fadie, cun dificoltât:
o cirivi di meti ordin tal gno cjâf. O talpinavi sù e jù, o pensavi ce che o jerin un par l'altri, nô doi (Alan Brusini, Gian Paolo Linda, I forescj);
ducj [i presonîrs] a sbassin il cjâf cidins e a talpinin dulà che ur berlin e ur segnin di talpinâ (Ivano Urli, Storie di Vera);
in montagne i cjavrûi e i gjai di mont a vevin un voli e un nâs che prime di brincâju tu vevis di talpinâ zornadis e cumbinâ di vê l'aiar dut a favôr (Riedo Pup, I furlans e la cjace)
Sin. cjaminâ
, talpetâ
-
fâ lavôrs, ativitâts variis che a fasin cjaminâ, lâ sù e jù:
tu âs talpinât dut il dì… tu sarâs strache muarte… (Pieri Menis, Si disarès che e je inventade);
la Ulive e talpinave tai siei lavôrs (Maria Forte, La tiere di Lansing)
Sin. trotâ
-
v.tr.
passâ, traviersâ, fâ cjaminant:
i furlans, che al è un pieçon che a talpinin la Europe, a son za a puest cu la dinamiche storiche (Riedo Pup, Il «ceppo» dal assessôr);
talpinâ il bosc par cjapâ sù cjastinis (Maria Forte, Il vivi al è chel rangjâsi)
Sin. pescjâ2
-
v.tr.
cjalcjâ cui pîts:
i ôcs a lavin ancje di bessôi, fin sul cjanton de place, a sfiliâ chê jerbute che nissun talpinave (Maria Forte, I ôcs di Miute)
Sin. talpassâ
, cjalcjâ
, pescjâ2
, talpâ
, tibiâ
, folpeâ
-
(fig.)
meti sot, dominâ, maltratâ e v.i.:
al à dibisugne di jessi talpinât e coionât (Josef Marchet, Il manarin tal cûr)