Dizionari de Lenghe Furlane

partecipâ  par|te|ci|pâ  [FO]

1. v.intr. intervignî intune ativitât puartade indenant di plui personis:  o soi stât un dai nûf fondadôrs di «In Uaite» cun Mauro Tosoni e o ai partecipât a lis manifestazions di chei agns (Christian Romanin, Amato De Monte: Il Friûl, patrie des bataiis di civiltât)
   Sin. intervignî , jentrâ a part , vê part
   Var. participâ
   
   1. impegnâsi intun confront, intune competizion e v.i.:  ducj i musiciscj furlans plui impuartants dai ultins 15-20 agns a àn partecipât almancul une volte, ma par solit plui di une, al concors [Premi Friûl] (Max Mauro, Un Friûl difarent: i 90 mhz di Onde Furlane)
      Sin. concori
2. v.intr. cjapâ part ative, colaborâ, dâ un contribût:  Mi veve butade li une mieze propueste di partecipâ ae preparazion di une golaine di libris su lis minorancis di Italie (Adrian Cescje, Memoriis di politiche linguistiche); cu la L.R. 3 dal 2002 ancje la regjon e à partecipât cuntun supuart impuartant al finanziament aes scuelis (Linda Picco, Sandri Carrozzo, Efiets economics e ocupazionâi des leçs di tutele de lenghe furlane)
   Sin. concori , dâ une man , impegnâsi , meti man , vê man , vê part , colaborâ , contribuî
   
   1. (ancje ass.) di un arlêf, jessi pôc o tant atent a scuele:  il frut al partecipe cun costance e impegn
      Sin. interessâsi
3. v.intr. vê part, insiemi cun altris, di un dirit, di un onôr, di un benefici, di une cundizion e v.i.:  i contadins, adun cui citadins, si distacarin [dai Stâts Provinciâi de Contee] te sperance di vignî vie di tribûts masse onerôs. Cussì a pierderin il dirit di partecipâ ae distribuzion des tassis publichis (Ferruccio Tassin, Autonomie tal Friûl austriac); o partecipìn de sô vite, de sô muart e de sô resurezion [di Crist] (Francesc Placerean, Crist resurît al colme dute la sperance dal om)
   Sin. cjapâ part , gjoldi , lucrâ , vê part
4. v.intr., v.tr. fâ savê:  lu passai [il regjistri] di insom fin da pît trê voltis prin che il zovin impleât, cence cjalâmi tai voi, mi partecipàs che e jere ore di sierâ (Gianluca Franco, Il solt di Arlunc)
   Sin. meti a part , fâ part , dâ part , comunicâ
   
   1. jessi dongje, fâ savê che si è dongje in moments impuartants, spec. di dolôr o gjonde:  o ringraciìn di cûr ducj chei che a partecipin al corot da la famee (Famee Moreâl, Necrologji Bepi Moreâl)
      Sin. condividi , vê part