Dizionari de Lenghe Furlane

gjoldi  /-ó-/  gjol|di  [FO]

1. v.intr. sintî un grant plasê:  e la int e à tacât a ridi, a ridi e à gjoldût come mai (Pieri Somede dai Marcs, In teatro)
   Sin. diletâsi , divertîsi , fâ fieste , molzi , ricreâsi , sorâse , tetâ
   Var. gjoldê
   
   1. compuartâsi o cjapâ lis robis in maniere di stâ ben, di vê plasê:  olêtmi ben che a no us coste nie, / fin che sin sans gjoldìn cun alegrie (Ermes di Colorêt, I, 33); la citât e varès volût vêlu par fâlu deventâ un om cualunche, che al vîf par vuadagnâ e gjoldi il plui pussibil (Pieri Somede dai Marcs, O sielç lis stelis)
   2. (coloc.) rivâ al orgasmi
      Sin. molzi
2. v.intr., v.tr. vê plasê par une reson che e ven specificade:  destinâ plui timp a gjoldi di ce che si à che no a lamentâsi di ce che al mancje (Riedo Pup, Bastarès fâ Nadâl dut l'an); il tei al viveve ben lui […] Al gjoldeve il soreli e al slargjave i ramaçs (Maria Forte, Il tei)
   
   1. mangjâ, bevi o ancje fumâ alc di bon:  Menie e jere strache pardabon e dome in chê volte si sentà a gjoldi un cafè, in pâs (Maria Forte, La fie çuete); al impià il zigar […] al gjoldè un dôs bocjadis di fum e po al fevelà (Dino Virgili, La aghe da pît la cleve)
   2. mangjâ o bevi alc, ancje cence riferiment al plasê, ma dome al nudriment che al da:  nol gjolt nuie, nome cualchi cjicarute di brût (Giulio Andrea Pirona, Novo vocabolario friulano)
      Sin. cjoli
   3. viodi o sintî cun plasê alc:  cui che al rive fint a venti, al gjolt un spetacul di flabe, lant sù par chê scjale di piere che lu lasse rivâ fint a la bocje dal foran (Josef Cjargnel, La regjine dal Landri); la int e va a sentâsi par fâ cuatri cjacaris, gjoldi la viste e cjapâ un fregul di aiarin (Arturo Feruglio, Viaç a Vignesie)
3. v.intr., v.tr. vê la disponibilitât e il benefici di alc:  no dutis [lis publicazions] a gjoldin di finanziaments publics (Erika Adami, La promozion de lenghe furlane sui mass media); e va a finîsi che la tô pension le gjoldin i fîs e i nevôts (AAVV, Sul florî); la grande libertât che l'artist e il filosof a gjoldevin in Elade e permetè a ognidun di percori il so troi (Adrian Cescje, Viaç aes origjins dal Logos); a domandavin che il Friûl Orientâl al podès decidi di bessôl il so destin e al gjoldès dal dirit ae autodeterminazion (Carli Pup, La seconde Irlande)
   Sin. avantazâsi , avalêsi , doprâ , beneficiâ , usufruî

Proverbis:

• bisugne gjoldi e lassâ gjoldi
• contentâsi dal fat so e gjoldi plui che si po
• cui che al gjolt dal mâl dai altris co a vegnin lis disgraciis al vai di bessôl
• cui che al gjolt di zovin al stente di vieli
• cui che al gjolt la domenie al vaiarà di lunis
• cui che al lavore in zoventût al gjolt in veglece
• cui che al stente di zovin al gjolt di vieli
• cui che al vûl gjoldi di domenie che al sparagni la sabide
• cui che pôc al spint pôc al gjolt
• cui che se vûl che se gjoldi
• cui che si contente al gjolt
• dal pôc si gjolt, dal masse si fâs gnocis
• dal pôc si gjolt, dal trop si fâs gnocis
• fra doi litighents il tierç al gjolt
• gjoldi cuant che si pues e tribulâ cuant che si scuen
• gjoldi e lassâ gjoldi
• gjoldi nol è mai muart
• gjoldi simpri fin che si po, no i mancje mai timp al patî
• la gracie di Diu e je dade par che si gjoldi
• la robe no je di cui che le fâs ma di cui che le gjolt
• miôr che al gjoldi un che no nissun
• nol è mai muart gjoldi
• pôc si spint e pôc si gjolt
• se o ai ben lu gjolt, se o ai mâl lu zem
• se pôc o sint, pôc o gjolt
• se tu âs ben gjoldût, se tu âs mâl semenât, friditi tal to gras
• vin, femine e morons a van gjoldûts te lôr stagjon
• vite e gjolt, vite e paie