Dizionari de Lenghe Furlane

invidâ¹  in|vi|dâ  [FO]

1. v.tr. clamâ cdn. a fâ alc insiemi:  al invidà mari e fie a lâ cun lui la dì che al firmà il contrat par la compre dal teren (Carlo Sgorlon, Ombris tal infinît); si fâs dongje a Romane e le invide a balâ cun lui (Pieri Menis, Doro)
   
   1. (par anton.) clamâ cdn. a partecipâ a une fieste, a mangjâ, a bevi, o a passâ timp in cjase:  dopo, jessint tart, lu invidarin a bevi un got a la ostarie (Luigi Gortani, Sant Martin); un cjaçadôr al saveve che al plevan i plasevin lis pernîs e alore lu invide a gustâ a cjase sô inte domenie (Andreina Nicoloso Ciceri, Lis pernîs - Racconti popolari friulani I)
2. v.tr. clamâ cdn. a lâ a un incuintri, a une cunvigne e v.i.:  mi veve invidât a une cunvigne su la cuistion sarde che al varès organizât in Sierade a Sassari, e o soi lât (Adrian Cescje, Memoriis di politiche linguistiche)
   Sin. convidâ
3. v.tr. domandâ cun creance a cdn. di fâ o di dî alc:  lu veve congjedât invidantlu a pensâi parsore, a rifleti (Meni Ucel, Ideis); al dismontà de machine invidantle a fâ compagn (Fabian Ros, Un piçul particolâr); int che al è ancje dibant invidâle a pensâ e a considerâ, parcè che la machinute dai pinsîrs le àn dissipade e fûr di ûs (Josef Marchet, Lis predicjis dal muini)
   Sin. conseâ , convidâ , domandâ , esortâ , preâ , racomandâ , sburtâ
   
   1. dâ un ordin o fâ une racomandazion formâl:  la Risoluzion e invidave i guviers a "dâ competencis diretis in materie di ûs de lenghe ai ents locâi" (Marc Stolf, La Cjarte di Strasburc dal 1981. Une Risoluzion "storiche" e ancjemò di atualitât)
4. v.tr. (fig., ancje ass.) fâ vignî voie, atrai, jessi favorevul par alc:  il Cuar […] al someave fat a pueste pai fruts. Il lavio cun ducj chei claps e cun chê aghe nete che e coreve, e lis rivis cun chei boscs plens di sucrits, ju invidavin in ogni stagjon (Lucio Perès, Tal Cuar); si cjatavin mo ca mo là, tai paîs, tai cjamps e tai boscs co il timp al invidave (Alan Brusini, Par stradis lungjis)
   Sin. atrai , clamâ , fâ buine voie , fâ la biele voie , fâ vignî voie , fâ voie , indusi , invoiâ , meti voie , persuadi , stimolâ , tirâ
5. v.tr. zûcs tai zûcs di cjartis, clamâ une cjarte o un colôr:  invidâ a spadis
   
   1. tal zûc dal poker, proponi la pueste in zûc:  invidâ di tresinte euros

Proverbis:

• cui che al va a gnocis cence invidâ nol cjate cjadree par sentâ
• la mê creance e je di invidâ, la tô di dî di no