preâ
pre|â
[FO]
-
v.tr.
(ancje ass.)
dreçâ preieris a Diu, a une divinitât o sim. par rindi graciis, par vê jutori, par otignî un confuart e v.i.:
jo o sai che al è un Diu e o voi a preâlu in glesie (Maria Forte, La tiere di Lansing);
[il vescul Nogara] a Udin, si sintì in dovê di ubidî al guvier cuant che i domandà di improibî di preâ e di fâ dutrine par sloven e, par fuarce, par furlan (Francesc Placerean, Cuintristorie dal Friûl dal 1866 fint in dì di vuê);
"Prea, Pauli, prea. A è propit di preâ. A sarès di tacâ il De Profundis aromai" (Pier Paolo Pasolini, I Turcs tal Friûl)
Var. preiâ
-
v.tr.
domandâ alc a cdn. cun umiltât, sumission, disperazion, malpazience e v.i.:
"Ti prei," le sconzurave la puarete "lassimi lâ! […]" (Franca Mainardis, Un bosc cence colôrs);
lassimi in pâs, ti prei, vuê! Soi strac dal lavôr (Dolfo Zorzut, No je plui vive)
Sin. domandâ
, invidâ1
, pocâ
, implorâ
, suplicâ
, sconzurâ
-
domandâ cun insistence:
timps di tante bondance [di predis] che il vescul Nuiâr al scugnive preâ i plevans che si tignissin un capelan par caritât de bocjade (Antoni Beline, Pre Pitin)
Sin. domandâ
, invidâ1
, pocâ
-
domandâ cun zentilece, domandâ par plasê:
Tilde e protestà che e voleve jessi cun lôr, ma Nedo le preà di restâ (Gianni Gregoricchio, Trê feminis);
«In ogni mût, siore Fabie, jo i dîs gracie par cumò, e le prei di no spandi la vôs fin che l'afâr nol è a bon» (Maria Forte, La tiere di Lansing);
une dì al le dal ustîr par preâlu di butâ une peraule al marangon, par viodi se al veve intenzion di vendi o di fitâ (Carlo Sgorlon, Prime di sere)
Proverbis:
- a preâ e altri ben no fâ, a cjadaldiaul no si fâs di mancul di lâ
- a preâ nol è pecjât
- cul mangjâ si vîf, cul preâ si va in paradîs
- i miedis: preâ il Signôr che a son e po no vênt dibisugne
- il lavorâ al è preâ
- lavorâ come che si ves di vivi simpri, preâ come che si ves di murî daurman
- lis invenzions: prin preâ par vêlis e po parcè che lis vin vudis
- o preâ o paiâ
- preâ e ben no fâ, al è tant che blestemâ
- tasê, lavorâ, patî, preâ