Dizionari de Lenghe Furlane

incuintri²  /-uìn-/  in|cuin|tri  [FO]

1. s.m. il cjatâ, il cjatâsi di dôs o di plui personis, o ancje elements o robis, spec. casuâl:  il pinsîr di Otti mi tormentave […] O pensavi al prin incuintri cun jê, cuant che o crodevi che al fos ancje l'ultin (Alan Brusini, Gian Paolo Linda, I forescj); cuant che si passave parentri, sot de muraie voluçade di elare scure, sì e no che si olsave trai il voli di chê bande, che guai di no fâ cualchi brut incuintri (Josef Cjargnel, Il gjatat neri dai Fers)
   Sin. cjatade , intop , scuintri
   Var. incuintre , incuntre , incuntri , incontre
   
   1. impegn a cjatâsi intun ciert puest a di une cierte ore cun cdn.:  jo ti farai di copari, o prepararai une fiestone, par l'incuintri cul morôs, sêstu contente? (Pieri Somede dai Marcs, A la oselade)
      Sin. apontament , cunvigne , ore pontade
   2. esperience dal cjatâsi o persone che si cjate:  lis esperiencis positivis, i incuintris, i traumis, i incidents, i corots a incidin sul gno mût di fâ esperience e a costruissin la mê identitât (Erika Adami, Une bombe colorade tal mieç dai confets)
2. s.m. riunion di plui personis, ancje organizade, cuntun fin precîs:  o vevi fevelât cul deputât dal Pci Arnalt Baracêt, che al menave la cause de tutele des minorancis linguistichis, par che nus cumbinàs un incuintri cu la Jotti (Adrian Cescje, Memoriis di politiche linguistiche); une fieste di culture, cun musiche, teatri, incuintris e dibatits (Max Mauro, Un Friûl difarent: i 90 mhz di Onde Furlane)
   Sin. colocui , cunvigne , riunion
3. s.m. confront sportîf o in ogni câs competitîf:  inte ultime part dal incuintri il Verona si impegne ancjemò di plui a tignî la bale lontan de aree di rigôr e l’Udin al rive a tirâ in puarte dome une volte (Marc Stolf, Verona - Udinese 1-0)
   Sin. competizion , gare , scuintri
4. s.m. ocasion par intiessi rapuarts, mût di jessi in buinis relazions:  siore Lise e veve simpri cirût incuintris cu la int, parcè che e diseve: "No si pues mai sei tant bogns che ducj nus mangji, ma nancje tant triscj che ducj nus lassi" (Maria Forte, Cjase di Dalban)
5. s.m. [BF] ocasion, coincidence:  se mi ven l'incuintri o disarai ben ce che o pensi
6. s.m. fat che al capite:  [i mucs che a ocupavin la cjase] a vevin fracassât e brusât cence dûl. Ma lôr [tornadis dopo finide la vuere] no volevin avilîsi par chel brut incuintri (Maria Forte, Cjase di Dalban)
7. s.m. favôr, agradiment, viôt fâ incuintri
   Sin. agradiment , consens , esit , favôr , laut , rispueste , risultât

Proverbis:

• scrite la letare, cjatât l'incuintri