golaine
/-à-/
go|lai|ne
[AF]
-
s.f.
ornament che si met intor dal cuel:
anei, veris, pontepets, rincjins, braçalets golainis e cordons, dut di aur (Pieri Somede dai Marcs, La Madone dai siet dolôrs)
Var. golane
, colane
-
s.f.
cengle di corean o fasse di altri materiâl che si met tor dal cuel di cjans o gjats, par menâju cul sguinçâl, par metii une medaiute di ricognossiment e v.i.:
cjanuts di mieç chilo, che lis sioris cence canaie a nudrissin in tinel e ju menin a spas peâts cuntune cjadene di arint pe golaine ricamade (Josef Marchet, Lis predicjis dal muini)
Sin. golâr
, gorziere
-
s.f.
cjadene par tacâ i bûs sot dal jôf:
al vignive jù di Pradis cu la man te mantie de golaine, lui e lis vacjis, a pâr (Riedo Pup, Meni Elar)
-
s.f.
(fig.)
serie di tescj o di altris oparis cun carateristichis in comun:
i risultâts de ricercje a son stâts publicâts tal Març dal 2001 inte golaine dai "Cuaders dal Centri Interdipartimentâl pe Ricercje su la culture e la lenghe dal Friûl" (Linda Picco, Ricercje su la condizion sociolenghistiche dal furlan);
la golaine Musiche Furlane Fuarte, passe 50 cds, publicâts fra il 1998 e il 2017, che a àn dât une pocade ae evoluzion de musiche furlane (Serena Fogolini, Daûr di un sucès e je simpri une buine scuadre)
Sin. colezion1
, racuelte
, serie
-
schirie di elements o di fats un daûr di chel altri o un dongje di chel altri:
l'an de Rivoluzion Francese, ven a stai il 1789, al fo pal Friûl une tremende golaine di disastris (Angelo Floramo, Il ‘700: ancje la tiere e fâs rivoluzion);
cuant che si cjale a Nord di Tarcint viers de golaine di monts che i stan daûr, no si pues fâ di mancul di viodi une glesie rimpinade insom di un çuc (Walter Tomada, Dôs zimulutis a inluminin Stele)
Sin. cjadene
, rie
, schirie
, teorie
, rosari
, sfilze
, filaine
, corone