Dizionari de Lenghe Furlane

cjoche  /-ò-/  cjo|che  [AF]

1. s.f. bevude une vore bondante di alcolics e efiet dal alcul bevût in grande bondance, che al fâs pierdi la luciditât:  mi àn menât in paîs, e là a volevin incjocâmi: ogni bon fornasîr al veve di fâ almancul une cjoche par stagjon (Pieri Menis, Il gno prin pâr di scarpis); oh, biele la vite cuant che la cjoche i disfave dut: passât, presint e avignî. I dave zornadis cence memorie (Maria Forte, La tiere di Lansing)
   Sin. simie , bale , pipine , trusse , susine , steche , sfisie , plombe , cuete¹ , çufule , çusse , implombade , incjocade , piruce
2. s.f. (fig.) efiet di alc che si cjape, si fâs, si vîf, si à e v.i. cun masse bondance, fûr di misure:  "Toni" al scomençà a discori il plevan "la cjoche de libertât adun cun chê dai bêçs, e je plui dure di pissâ che no chê dal vin!" (Tarcisio Venuti, La cjase di Toni)
3. s.f. (fig.) cundizion di irazionalitât causade di une grande passion o ilusion:  al è juste un principi, un prin pas de bande di un spirt umanitari, di une civiltât plui largje e inteligjente, une piçule mostre di ce che a varessin di capî e di fâ ducj i popui, dopo la cjoche nazionaliste durade un secul e mieç (Josef Marchet, Voltâsi ator)
   Sin. cuete¹ , calorade
4. s.f. (fig.) inamorament che al fâs pierdi il cjâf:  une biele fantate, la Marculine, ducj lu diseve, ma plene di bardele e di pratesis. Dree al cjapà une grande cjoche di jê (Anna Burelli Delendi, Dreate di Cjêl)
   Sin. cuete¹ , calorade

Polirematichis e espressions idiomatichis

• cjoche legre loc.s.f.
• cjoche triste loc.s.f.
• cjoche vaiote loc.s.f.

Proverbis:

• e je triste la cjoche dal pan
• e je triste la cjoche dal vin, e je piês chê dal zigar, ma la piês e je chê dal pan
• la cjoche dal pan e je piês di chê dal vin
• passade la cjoche si sint la bote