Dizionari de Lenghe Furlane

cite  ci|te  [AF]

1. s.f. recipient, in gjenar di forme cilindriche cun doi manis e un tapon, o in câs ancje di altre sorte, doprât par cusinâ la robe di mangjâ:  e veve puartât ca su la taule la cite di crep de mignestre e ur indi veve dade une cjace parom: fasûi e ravis (Meni Ucel, Purizions); none Luzie, fate sù tun grumâl a riis grisis e neris (la taule le veve preparade dongje il fogolâr) e jere indafarade cu lis citis sul spolert (Alan Brusini, Come tai romançs)
   Cfr. bronzin² , brumâl³ , cit¹ , cjalderie , cjaldîr , ram¹ , stagnade , padiele , fersorie , pignate
   
   1. robe o cuantitât di robe tignude in chel recipient:  intant che e bulive la cite, e vignive a dâ une man tal mulin (Dino Virgili, Come tornâ fruts)
2. s.f. contignidôr par tignî la robe di mangjâ, o in câs ancje altre robe, ma no par cueile:  biel che o passavi a pâr dal cjan, no ai rivât a comandâmi e la man e à gafât de sô cite un piç di crostis di pan neri che i jerin vanzadis (Ivano Urli, Storie di Min)
   Cfr. cit¹ , gamele , gamelot , gamelin
   
   1. cuantitât di robe tignude in chel contignidôr:  "Comari mi 'nt prestêso / ne site di farine?" (Zuan Minut, Cui aie reson)
3. s.f. (fig.) situazion, complès di elements, soredut se al è un ciert caratar di riservatece o di dinamicitât, complicazion, novitât e v.i.:  un voli a cjase nestre e un voli lontan, ma lontan une vore, par no pierdi di viste ce che al bol te cite internazionâl (Josef Marchet, Preambul rusin); «Ce bolial vuê te cite dal borc? Ce disial siôr Popul e done Int?» (Maria Forte, La tiere di Lansing); e saltà fûr une «Mozion dai predis» cun 529 firmis che e diseve il so dret a la pulitiche […]. Al fo doprât ancje il vescul par taponâ la cite. Ma ancje cheste volte al è stât dut dibant (Francesc Placerean, Cuintristorie dal Friûl dal 1866 fint in dì di vuê)
4. s.f. [TS] zûcs zûc popolâr li che, pal solit jessint bendâts, si à di rompi cuntun baston un contignidôr cun dentri sorpresis o regâi:  e zuiarin di çoncs e di purcite: / se varìn claps, o traiarìn al gjal; / cui voi bendâts o romparìn la cite (Pieri Çorut, A Tite Bas)
5. s.f. (fig.) il cjâf e la capacitât di resonâ:  ma lui no vevial mai pensât? Al somee di no. Ta chest esercit mi pâr che un grum di int no dopri la cite (Checo Tam, Neapolis)
   Sin. cassele , cjâf , gamele , cit¹ , coce

Polirematichis e espressions idiomatichis

• fâ tiere di citis loc.v.
• fûr cu la cite loc.adi.inv., loc.av.
• lâ a fâ tiere di citis loc.v.
• pierdi il lat e la cite loc.v.
• rompi citis loc.v.
• rompi lis citis loc.v.
• rompiment di citis loc.s.m.

Proverbis:

• cite rote no mûr mai
• cui che al sa fâ la cite al sa fâ ancje il mani
• cul cjalt dai bleons no si fâs boli la cite
• cul cjalt dal jet no si scjalde la cite
• e dure plui une cite sclapade che no une gnove
• e vâl plui la cite viere che no la gnove
• il cjalt dai bleons nol fâs boli la cite
• l'onôr nol fâs bulî la cite
• la cite dal artesan se no bol vuê e bol doman
• la cite dal marcjadant e bol tremant
• la cite rote e je chê che e ten dûr
• lis madonis a van ben picjadis sù pal mûr e lis brûts inte cite
• nissun sa ce che al bol te cite di chei altris
• si trussin ancje lis citis che a stan fermis su la nape