cjaldîr
cjal|dîr
[AF]
-
s.m.
recipient avonde grant de cusine tradizionâl, pal solit di ram, doprât par puartâ la aghe e par tignîle in cjase:
«Dulà isal il paîs dai Pagans?». I domandarin a di chê viele che e leve cui cjaldîrs a cjoli aghe su la beorcje (Josef Cjargnel, I pagans di Muine);
cetante aghe che e tirave sù dal poç! E spesseave a buinore a incolmâ cjaldîrs e podinis cun aghe serene. Dôs jemplis ogni dì (Maria Forte, Cjase di Dalban);
a vignivin sul roiuç lis feminis a freâ i cjaldîrs. Chei a tornavin lusints tant che a pene screâts, e pe vile si sparniçave l'odôr dal asêt metût te farine di polente par lustrâju (Lucio Perès, Vilie di fieste)
Var. cjaldêr
-
cuantitât di aghe, o in câs di altri licuit, tignude in chel recipient:
na femina a butâ mieç cjaldeir di aga sul fouc (Novella Cantarutti, Il sâr Menon);
e zontave un cjaldîr [di vin] di cuartês di plui e e diseve: chest chi, par vie che i fruts a àn mangjât ue tal vignâl (Riedo Pup, I furlans e i predis)
Proverbis:
- ancje in cusine i cjaldîrs e àn lis orelis
- il cjaldîr che al ciule al è chel vueit
- se si à di inneâsi, miôr tal mâr che no tal cjaldîr
- tant al va il cjaldîr tal poç che infin al reste