Dizionari de Lenghe Furlane

cassele  /-èl-/  ca|sse|le  [AF]

1. s.f. contignidôr plui o mancul retangolâr, avonde grant, pal solit di len o ancje di altris materiâi:  la Eve dal Nonçul a passave cuntune cassele di pomis e o mi jeri fermât par disi ce bielis pomis che veve (Jaio Furlanâr, I pecjâts di don Jaio); o scuen vierzi il buc dal spolert; e metii dentri un toc di gjornâl; e cjoli fûr de cassele dai lens chei doi stecs che a coventin […] (Meni Ucel, La Gjis); mestri Nart [il fari] al rivà sul puest cu la cassele dai imprescj e dai ramondins (Roberto Ongaro, Cretevierte)
   Cfr. casse , scjate , scjatule
   
   1. cuantitât di robe che e sta ta chel contignidôr:  al è jentrât intal cason, là che aromai dut al è pront: la piçule stue, dôs casselis di lens par scjaldâsi (Cristina Noacco, Faliscjis)
2. s.f. contignidôr o mobil sierât li che si tegnin i bêçs:  Cec Burelon, Meni dal For e Toni Gorlete a vevin di scrocâi cualchi francut par trasferîlu dal moment te cassele di Florean Baduscli, sore di un tai di pulie (Josef Marchet, Lis predicjis dal muini)
   Sin. casse
   
   1. mobil cuntune busute par meti dentri ufiertis:  [il muini] dopo fat il zîr pe glesie cu la borse, al leve dret su la grande cassele dal altâr di Sant Antoni; al strucjave la sacoce plene di palanchis li, in presince de int (Riedo Pup, I furlans e il muini)
3. s.f. mobil grant, di len, avonde bas e lunc, che si dopre par meti vie robe e che, di sierât, si pues ancje doprâ tant che bancje:  a tirà four i lensôi e a ju poà sul jet: «Cjo mo, fia. Li tô cuiertis a son ta la cassela.» (Novella Cantarutti, "Uta, Ututa improntiti"); o viodìn i lôr intais tal len: che a fasin za pensâ a lis bielis casselis dai tinei (Antoni Beline, Scuele: invasion di… furlans)
4. s.f. scansel grant:  lu puartai in sagristie, te cassele basse dal armaron, dulà che o ten i gosops des cjandelis, i spergots di cere, il sborf e altris catans (Josef Marchet, Lis predicjis dal muini)
5. s.f. (fig., scherç.) il cjâf e la capacitât di doprâ la inteligjence:  nol veve la cassele tant fûr di scuare di no savê indulà che al jere vignût a poiâ i vues (Franca Mainardis, Aiar di cjase)
   Sin. cjâf , cjast , luminarie , melonarie , cit¹ , casselot
6. s.f. [AF, TS] mus., tecn. viôt cassete :  dopo cualchi cassele folk jessude intai agns Otante, intal 1998, al publicà l'album e cd "Anime femine" (Elio Varutti, Il memoriâl di Gigi Maieron)

Polirematichis e espressions idiomatichis

• bati la cassele loc.v.
• cassele des animis loc.s.f.
• fûr cu la cassele loc.adi.inv., loc.av.
• fûr cu la cassele dai sintiments loc.adi.inv., loc.av.
• lâ ator cu la cassele loc.v.
• lâ fûr cu la cassele loc.v.