cavalîr
ca|va|lîr
[FO]
-
s.m.
cui che al va a cjaval:
un rumôr al devente simpri plui net un clopetâ di cjaval che si sdongje; e sù pe sô schene, un cavalîr tabarossât te manteline nere (Josef Cjargnel, La gnot di Sant Cjandit)
-
soldât o vuerîr a cjaval, riferît in maniere gjeneriche a diviersis realtâts gjeografichis e storichis:
tal museu di Cividât si pues viodi, tra chei altris, i reperts cjatâts te tombe di un cavalîr langobart de necropoli di Sant Maur;
sot di Vignesie il Friûl al jere clamât a contribuî ae organizazion militâr de Republiche cu lis Taiis […] formadis pe plui part di cavalîrs e balestrîrs (Carli Pup, Il Friûl de Joibe Grasse dal 1511)
-
s.m.
[TS]
stor.
in Rome antighe, cui che al jere avonde siôr di lâ in vuere a cjaval:
te deduzion di Aquilee a àn vût part 3000 colons, cu lis lôr fameis, e plui o mancul 300-400 tra centurions e cavalîrs, che a varessin formât la sorestanzie de citât (Mirta Faleschini, Stefano Magnani, Aldo Candussio, Gaetano Vinciguerra, Protostorie e storie romane in Friûl)
-
inte ultime ete da la Republiche e in ete imperiâl, cui che al faseve part de classe sociâl che e steve juste sot di chê dai senatôrs
-
s.m.
[CO, TS]
stor.
inte Ete di Mieç, cui che al combateve a cjaval, robe che e jere prerogative de nobiltât
-
persone o personaç che al va daûr dai principis dal eroisim, dal onôr e che al pare chei che no puedin difindisi:
jo mi imagjinavi i cavalîrs ducj vistûts di fier, intant che a ziravin il mont a cjaval (Carlo Sgorlon, Il dolfin)
-
s.m.
cui che si puarte in maniere zentîl, o ancje galante, massime cu lis feminis:
alore jê e veve frêt. Jo i ai dit che o varès pensât a scjaldâle (ce cavalîr!) (Checo Tam, Queen Anastasia)
Sin. galantom
, zentilom
-
s.m.
om che al compagne une femine intune ocasion mondane, soredut intun bal:
un gjornalist al sarà presint, cul librut des notis e un lapis gnûf, a tirâ jù il non e sorenon des plui zentîls balarinis e dai cavalîrs plui morbinôs (Josef Marchet, Lis predicjis dal muini)
-
s.m.
inte jerarchie eraldiche, il nivel juste sot di chel di nobil
-
s.m.
titul onorific o di apartignince a cualchi ordin di cavalarie:
cavalîr dal lavôr;
cavalîr de republiche;
e jere stade la plui fortunade a cjoli il diretôr des scuelis, cavalîr de corone e po comendatôr e, insiemi, a vevin fate une biele famee (Alan Brusini, Come tai romançs)
-
s.m.
[CO, TS]
zoot.
ruie de pavee Bombyx mori, arlevade par vie che e fâs la sede:
Zanon al cirì ancje di difondi une culture di coltivazion dai morârs intes campagnis, e di arlevament dai cavalîrs (Adrian Cescje, Liniis di storie sociâl e economiche dal Friûl 1500 - 1800);
ogni an un gridiç di cavalîrs al nudrive une ace di sede dome par jê (Maria Forte, La cotule di none Betilde);
mês di Mai e rive ancje sore la colmace dai cavalîrs che il pai al ten a miezis cun paron Gjovani tun sotet in vie Sante Marie (Ivano Urli, Storie di Min)
Cfr. sede1
, galete2
, bigat
, fuee
, bosc
, doplon
, volte de sede
, volt de sede
, lâ a filâ
, cjapâ la fuee
, morâr
, butâsi
, durmide
, bavele
, stramaçâr
, lâ in vacje
-
dispès in espressions di comparazion:
miârs e miârs di poleçs, fis come cavalîrs, tenars come lacais, che a cressin come foncs (Riedo Pup, I furlans e lis bestiis);
tancj a vevin cambiât piel come i cavalîrs (Maria Forte, Cjase di Dalban);
al stave li dûr dûr come un cavalîr stucât (Maria Forte, Cjase di Dalban);
o sin ducj involuçâts tai segrets militârs, come i cavalîrs te bavele (Riedo Pup, Lis mudantis tricolôr)
Proverbis:
- cuant che si vierç il fassinâr, si cognòs cemût che a àn filât i cavalîrs
- se al plûf il dì di Sant Zorç, il cavalîr al va te cort