Dizionari de Lenghe Furlane

bandonât  ban|do|nât  [FO]

1. p.pass. viôt bandonâ , viôt bandonâsi
2. adi. di cdn., che al è stât lassât di bessôl:  un istitût par vuarfins e fruts bandonâts; al passà di cheste vite çavariant, misar e bandonât tant che un cjan (Josef Cjargnel, La liende di Dimponç)
   Sin. bessôl , derelit , trascurât , sengul
   Var. abandonât
   
   1. che nol à une vuide o che nol è assistût:  la popolazion e jere bandonade a se stesse e e viveve sot il pês de precarietât dai events te plui difondude ignorance (Raimont di Strassolt, Lis tradizions popolârs furlanis); la confusion e regnave ad in plen su la puare Italie bandonade a se stesse cence nissune direzion clare e sigure (Roberto Ongaro, Il muc); no si viôt une tonie di predi che al si interessi di chestis fameis, di cheste canaie bandonade… (Josef Marchet, Lis predicjis dal muini)
      Sin. bessôl , derelit , trascurât
3. adi. di un puest, dulà che nol è plui a stâ nissun:  placis vueidis di paîs bandonâts (Carlo Sgorlon, Ombris tal infinît); lavorâ di gnûf i terens pustots, nivelâ i cjamps, fâ arzins e drenâ lis aghis, regolâ lis cjasis bandonadis (Matteo Ermacora, La emigrazion furlane in France 1820-1970)
   Sin. desert , desolât , disabitât , inabitât , pustot
4. adi. lassât cence coltivazion:  [sutive, Allium vineale] a si cjate intai vignâi, par chest il so non, intai cjamps bandonâts, intai boscs, dongje des stradelis dai cjamps (Giorgio Pascoli, Il Litum: jerbis salvadiis te cusine)
   Sin. sbaldinât , pustot
5. adi. salvadi, caraterizât de mancjance o de lontanance dai oms:  lis sepulturis, dongje, a fasin dûl tal lôr disordin, in chel aiar bandonât e dispierdût fra lis crôs (Maria Forte, La tiere di Lansing)
   Sin. desert , solitari , salvadi , isolât , rimit , desolât
6. adi. di alc, che par cualchi reson al è restât intun puest, soredut intun puest che nol è il so o in disordin:  su la taule a jerin ancjemò cjartis bandonadis a slas; un pâr di scarpis bandonadis tun cjanton
   Sin. lassât , molât , pierdût
   
   1. che nol à plui ativitât:  un branc bandonât dal Tiliment
7. adi. dal cuarp o di une part dal cuarp, rilassât:  al sintive, tant che se al fos in chel moment, il cuarp di jê, morbit e tuarteliç che si lassave puartâ, bandonât e fiduciôs (Roberto Ongaro, Cretevierte); al butave une smicjade de bande di Catine che cumò - lis mans bandonadis sul grim - e scugnive mostrâ la muse inte lûs che e ploveve de barconele (Gianni Gregoricchio, Trê feminis)
   Sin. slassât
   
   1. cence fuarce:  chel altri braç lu veve bandonât sul jet, fûr de plete (Amedeo Giacomini, Tal ospedâl)