Dizionari de Lenghe Furlane

stangje  stan|gje  [AF]

1. s.f. element lunc e plui o mancul fin, soredut di metal o di len, ma ancje di altris materiâi, doprât cun cualsisei funzion, tant che imprest o tant che toc di struturis o mecanisims plui complès:  si metè a lis stangjis e al provà a tirâ. Il cjaruç al jere avonde lizêr (Carlo Sgorlon, Prime di sere); une svintule di fusilarie e scjavaçà di colp tal mieç la stangje de bandiere rosse (Pieri Menis, Sul agâr); e jê e coreve a cjase, e sierave la puarte cu la stangje (Dino Virgili, Pôre tal nuie…)
   Cfr. aste , baston , pâl , piertie , sdrangulin , speroâl , steche , staze , anglîr , cjace² , paradôr , lignole , sbare , tregar , tres
   
   1. sorte di baston fissât pognet sot di un sufit par picjâ robis, in particolâr tai camarins e tes cjanivis:  a jerin stangjis di salams e di luianiis, di muset, di mule e polmonarie picjadis sù pai trâfs dal sofit neri (Pieri Menis, Il cuader de none)
   2. cuantitât di robe che e je picjade tal chel supuart:  dôs bafis di ardiel, la bufule dal saìn, trê stangjis di salam (Josef Marchet, Lis predicjis dal muini)
   3. element lunc e mobil, di metal o di len, par sierâ un passaç, soredut une strade in corispondence cuntun confin o un pedaç:  cheste volte si cjatarin impeolâts i paisans di Toni, par vie des stangjis de gnove frontiere (Tarcisio Venuti, La cjase di Toni)
   4. (fig.) il confin stes o il pedaç stes:  i mucs, lôr ju vevin praticâts par agns, di là de stangje su lis fornâs (Maria Forte, Cjase di Dalban); [i cjars grues] no paiavin nancje stangje parcè che a tignivin ben batude la glerie (Dino Virgili, La aghe da pît la cleve)
2. s.f. (fig.) persone alte e cuntun biel cuarp:  une stangje di fantat che al faseve vignî la aghegole a tantis (Josef Marchet, Lis predicjis dal muini)
   Sin. aste

Polirematichis e espressions idiomatichis

• in stangje loc.av.
• meti in stangje loc.v.
• stâ in stangje loc.v.
• tignî in stangje loc.v.
• tignîsi in stangje loc.v.