Dizionari de Lenghe Furlane

pierdite  /-èr-/  pier|di|te  [AF]

1. s.f. il pierdi, il no vê plui alc di materiâl o imateriâl o il pierdisi, il lâ al mancul di alc di materiâl o imateriâl:  la miseria, la piardita de la libertât e de la salût gjenerin dei dolôrs che vô no cognossêso (Zuan Luîs Filli, Il diau sul Studeniz); il nestri vivi sfladât, la pierdite dai valôrs tradizionâi a son ancje chei aspiets di un mont che al devente mat, che nol sa plui dicerni l'essenziâl dal superflui, la forme de sostanzie (Laurin Zuan Nardin, Di viaç cun Božidar Stanišić)
2. s.f. il no vê plui cdn., par vie che al è lontan, che nol sta insiemi, che nol è disponibil e v.i.:  il leam tra la esperience di pierdite di une persone e la depression e je stade interpretade di un pont di viste evoluzionist. La separazion di un frut de mari e determine, intun prin moment, une reazion di stress che e puarte il frutin a vaî, di mût di judâ la mari a cjatâlu (Franc Fari, Neurosiencis dal dolôr)
   Cfr. mancjance , lontanance
   
   1. il mancjâ di cdn. par vie che al è muart:  Agnul Pitane, poete, scritôr, inzignîr e soredut grant amì dal Friûl, al è mancjât ai 11 di Zenâr dal 2005. E je stade une grande pierdite che si fâs sintî inmò di plui cul passâ dal timp (Redazion Lenghe.net, Sedean al ricuarde Agnul di Spere, scritôr); dute la comunitât si strenzeve dongje la famee che e viveve il displasê di une pierdite (Manuela Quaglia, Storie di Nadâl)
      Sin. muart¹
   2. spec. tal pl., mancjance di oms e mieçs in operazions di vuere, par vie che a son muarts, ferîts, distruts, dispierdûts e v.i.:  il Conte Rosso al sprofondà daspò 14 minûts. No si cognosserin lis pierditis; te nâf a jerin soldâts talians e todescs (Checo Tam, La vuere di Checo)
3. s.f. (ancje fig.) implei di une risorse plui grant dal vantaç che al rive o cence nissun vantaç:  a jerin visitis che no vevin nissun savôr, a jerin, in sumis, dome une pierdite di timp (Franca Mainardis, Aiar di cjase); une ativitât costose e in pierdite (Max Mauro, Un Friûl difarent: i 90 mhz di Onde Furlane)
   Cfr. straçarie , passîf , ros
4. s.f. il jessi batût tun conflit, tun confront, tun zûc e v.i. e il so efiet, soredut su possediments, patrimoni e v.i.:  la pierdite dal fuart e determinà un plui strent assedi di Vignesie (Giovanni Pillinini, Zuan Batiste Cavedalis - Une vite esemplâr)
5. s.f. il lâ fûr di un materiâl, soredut fluit, di un recipient, di un condot, di une sede e v.i.:  une pierdite dal licuit di disfredament che e à obleât i tecnics a distudâ il reatôr (Alessio Potocco, Slovenie. Krško: probleme o risorse?)
   Sin. dispersion , jessude
   
   1. il distacâsi e il no jessi plui di une part, di un toc e sim.
6. s.f. ancje tal pl., jessude anormâl di fluits dal organisim uman
   
   1. spec. tal pl., te femine, flus mestruâl
7. s.f. il lâ jù di valôr, cuantitât, intensitât, impuartance e v.i.:  chei che il furlan lu "capissin e che lu cjacarin regolarmentri", che intal 1977 a jerin i 75% dal campion, orepresint (1998) a son restâts i 57%. Cuntune pierdite di 18 ponts (Luche Nazzi, Tirie dilunc la Vierte autonomistiche?)
   Sin. câl , sbassament