Dizionari de Lenghe Furlane

muart¹  /-à-/  muart  [FO]

1. s.f. il finî de vite:  il bevi e fumâ a movin brutis malatiis, come tumôrs, che a puartin la muart (AAVV, Sul florî); dopo la muart dal fi, no veve nissun che al viodès di jê (Roberto Ongaro, Il muc); o ai simpri vude la vite intal cjâf e no la muart, o ai simpri vût il pinsîr di vivi e di tornâ (Ivano Urli, Storie di Min); cjalâ in muse la muart cun serenitât, cun coragjo (Francesc Placerean, Pe muart di Fausto Schiavi)
   
   1. spec. cun iniz. maiusc., personificazion de muart:  deventât vecjo, Meni Fari une dì al stave juste fasint la polente, cuant che a l'improvîs e vignì la Muart par cjolilu (Luigi Gortani, Meni Fari); ma ancjamò a era parona la Muart cu la crepa sensa sarviel, cul pet sondar, fat come un cos (Ugo Pellis, Al mandolâr)
      Sin. chê cul falcet , Luzie di Mortean
2. s.f. condane capitâl:  dopo di un procès farse, i nûf a jerin stâts condanâts a muart e picjâts ai 10 di Novembar dal 1995 (Carli Pup, Teritoris - Oms di Libertât)
3. s.f. il cessâ, il finî:  ur vevi proponût di rifleti se la muart di une lenghe storiche, come che e podeve sei chê furlane, […] e veve di sei judicade un event cence valôr inte storie de civiltât o une pierdite di contrastâ (Adrian Cescje, Memoriis di politiche linguistiche)
   Sin. distruzion , fin² , ruvine
   
   1. ruvine, distruzion:  si scugnarà par fuarce vierzi tratativis tra chescj e chei par evitâ barieris doganâls che e causaressin il spopolament e la muart di chei paîs (Josef Marchet, In cercje di democrazie)
4. s.f. (iperb.) situazion une vore negative e cence soluzion:  pai Clevis, chê di lâ a tucâ il batali sul puarton dal cont [par domandâ bêçs] e sarès stade la muart (Dino Virgili, La aghe da pît la cleve); se no vuelin fâ la vuardie no je la muart (Riedo Pup, Il prin moto)
5. s.f. (fig.) stât di grant aviliment:  no lu cirì mai plui, e e tornà a cjase cu la muart tal cûr (Carlo Sgorlon, Il dolfin)
6. s.f. (fam.) maniere plui buine di cuei un aliment:  il spêt e la polentine e je la muart dai uciei (Giulio Andrea Pirona, Ercole Carletti, Giovanni Battista Corgnali, Il Nuovo Pirona)

Polirematichis e espressions idiomatichis

• a fîl di muart loc.av.
• a muart¹ loc.av., loc.adi.inv.
• in pont di muart loc.av., loc.adi.inv.
• sul jet di muart loc.av.
• sul pont di muart loc.av.
• vêle a muart loc.v.

Proverbis:

• altri al è fevelâ di muart, altri al è il murî
• cuant che no 'nd è, la muart no 'nd vûl
• cuant che no 'nd è, nancje la muart no 'nd vûl
• dôs disgraciis a son siguris: la muart e lis tassis
• dut si po justâ fûr che la muart
• e je piês la pôre de muart che no il murî
• il pecjât al ingjenere la muart
• il sium al è l'embleme de muart
• il sium al è la imagjin de muart
• il timp al passe e la muart e ven
• il timp e la muart a rompin i dissens
• la tô muart e je la mê vite
• malatie lungje, muart sigure
• si fâs e si dîs e la muart e tire pai pîts
• si vîf simpri cu la muart a la gole