malsigûr
mal|si|gûr
[AF]
-
adi.
che nol è fis, fer, che al à un ecuilibri o une posizion che a puedin cambiâ cun facilitât, soredut colant:
si sintivin a craçolâ e a zemi i scjalins e po a scloteâ lis breis malsiguris dal puiûl che, ogni pôc, si podeve vignî abàs (Maria Forte, La tiere di Lansing)
Sin. insigûr
, balarin
, inciert
, instabil
, malciert
, malfer
, precari
Var. malsicûr
-
di situazion, fenomen e v.i., che al pues cambiâ cun facilitât:
e jere une zornadesse malsigure fra mostris di seren e sgjarpiduris di nûi (Maria Forte, Cjase di Dalban)
-
che no si sa se al sarà o no, se al larà ben o se al larà mâl e v.i.:
lis prospetivis di guvier a son dut câs malsiguris (Anna Bogaro, I indipendentiscj a vincin in Scozie)
-
adi.
che no si sa se al è sclet, vêr, autentic, che no si sa ben se al corispuint ae realtât:
la storie e restave un pôc malsigure cussì che il timp nol faseve fature a scancelâle (Maria Forte, Mabile la Lunghine)
Sin. insigûr
, balarin
, inciert
, malciert
-
che no si cognòs ben, che no si rive a distingui ben:
la crôs ocitane, zale e rosse, e à une origjine malsigure, datade ator dal an Mil (Redazion Lenghe.net, Dut su la Ocitanie)
-
adi., s.m.
che, cui che nol sa ce fâ, che i mancje sigurece, fermece tal decidi o tal fidâsi di chei altris o di se stes:
tancj soldâts simpri ubidients, no savint ce fâ, i domandarin a lui un consei parcè che si cjatavin come sforeâts. Malsigûrs su la strade di cjapâ "Cosa facciamo adesso signor tenente?" (Maria Forte, Cjase di Dalban)
Sin. balarin
, inciert
, indecîs
, insigûr
, malciert
, esitant
-
che al mostre pocje sigurece, pocje fermece, pocje fiducie:
"Pax tibi!" disè une vôs basse e malsigure, tal scûr de capele. Fra Bernart nol veve sintût. "Pax tibi!" al riscjà un fregul plui fuart chel frari laic che al vignive indenant (Zuan Lurinçon, La Madalene)
-
adi.
che al pues jessi pericolôs:
la strade di Visc a Codroip e jere di fat malsigure par vie dai brigants (Pierluigi Visintin, Friûl e furlans te Histoire de ma vie di Giacomo Casanova);
cuant che una strada mena par un bosc, o pûr par un altri lûc malsigûr, e nel Unviar, dulà che l'è pericul dai lôfs […] (Antoni Brumat, Compendi di ducj i contegnos pal soldât comun tant in guarnigjon, come in cjamp devant il nemì, cul zurament e i articui di vuera)
Sin. pericolôs
, riscjôs
Cfr. azardôs