Dizionari de Lenghe Furlane

interni  /-è-/  in|ter|ni  [AF]

1. adi. che al è dentri o de bande didentri, che al ven di dentri e v.i.:  i vues a mantegnin te lôr struture interne un archivi de nestre storie biologjiche (Claudio Tuniz, Evoluzion umane: la sience e mostre i segrets des nestris origjins); diametri massim dal bossul 2,1; diametri interni de imbocjadure 1,5 [cm] (Lucio Perès, Une lance longobarde cjatade a Baracêt)
   Sin. dentri , didentri
   
   1. che nol da su la strade:  il sun dal gno pocâ si slargjà te stanzie interne, che mi someà, daûr dal rimbomp, une vore grande e vueide (Carlo Sgorlon, Il dolfin)
   2. che nol è di confin:  chê papute che e je stade stabilide pes regjons internis no je autonomie (Josef Marchet, No sin contents!)
   3. che nol è in comunicazion cul mâr o cun altris mârs:  il daûr de emisfere al jere il vêr mont abitât, cun profondissimis vals e flums e mârs internis (Checo Tam, Sense)
2. adi. (fig.) de part plui fonde dal pinsîr, dai sintiments e v.i.:  par jessi catolics, e covente dome la adesion interne da la anime (Francesc Placerean, Cuant che a un popul i gjavin la sô lenghe in glesie, al è pront par jessi soterât)
   Sin. dentri , didentri , insot , profont , font¹
3. adi. de politiche dentri dai confins di un stât:  la Patrie dal Friûl e vignarès a formâ un piçul stât che al varès di pensâ bessôl a un biel grum di cuistions internis di ogni ordin (Josef Marchet, Se e larà drete)
   Sin. nazionâl
   
   1. di dentri di une istituzion ancje a nivel plui bas dal stât o ancje di une organizazion, di une imprese e v.i.:  il difensôr civic al à dirit di acès (vision e copie) a ducj i ats aministratîfs, ancje i ats internis (Aministrazion Publiche, Statût dal Comun di Udin); al è impuartant che il personâl interni dai Istitûts al sedi formât e al vedi lis competencis e i recuisîts domandâts pal insegnament de lenghe furlane (Patrizia Pavatti, La tutele de lenghe furlane a scuele); lis dificoltâts tai rapuarts internis a vevin creât in radio une clime pesante e la autoritât dal diretôr no jere plui ricognossude (Max Mauro, Un Friûl difarent: i 90 mhz di Onde Furlane)
4. s.m. dome sing., ce che al è dentri, la part che e sta dentri:  l'interni [dal scarpet] al è di un tiessût plui resistent (Oscar Puntel, Scarpets, tai pîts la tradizion)
   Sin. dentri , didentri
   
   1. (fig.) part profonde dal pinsîr, de anime e v.i.
5. s.m. complès dai ambients sierâts, des stanziis di un edifici, in oposizion aes sôs parts esternis:  tal interni [de gleseute di Sante Luzie a Vençon] dôs statuis di piere (Apuestui) di man austriache de prime metât dal Cuatricent (Bepi Agostinis, Tancj tesaurs di Fielis a Vençon)
   
   1. [TS] cinem., teatr. senografie che e mostre un ambient sierât
   2. [TS] cinem. riprese zirade tun teatri di pose o dut câs tun ambient sierât:  no dome paisaç, cui siei toponims, ma ancje i internis a son realizâts e incidûts intai particolârs di un filmât che si môf biel planc (Erika Adami, Un voli su la culture furlane)
6. s.m. dome sing., zone dal teritori lontane dai confins o des cuestis:  proviodi, par cont de Nazion, al imbarcjament e al traspuart dai migrants che a domandavin di lâ a stâ tal interni (AAVV, Il prin furlan nassût a Avellaneda di Santa Fe)
7. s.m. numar doprât cualchi volte par identificâ ognidun dai apartaments di un condomini:  tal moment de declarazion di variazion di residence bisugne disi al Ufici la direzion dal gnûf lozament, disint cun precision la direzion di pueste, il numar civic, il plan, l'interni, la scjale (Aministrazion Publiche, Iscrizions di altris Comuns o dal Forest)
   Sin. numar interni , numar , puarte , apartament
8. s.m. numar dal telefon che al lasse il colegament dome cul interni di un edifici o di une aziende:  par domandâ informazion sui cors e su lis conferencis de Societât Filologjiche Furlane, si pues clamâ l'Ufici Formazion ([…] interni 3) (SFF, Cors di formazion)
   Sin. numar interni
9. adi., s.m. student che al frecuente un istitût scolastic vivint ancje dentri:  o jeri intun coleç tant che interni (Fabian Ros, Interviste cun Ignacio Vilar)
   Sin. arlêf interni , scuelâr interni , student interni
10. adi., s.m. candidât che al sosten un esam te scuele che al à frecuentât o dentri di une aministrazion li che al è za a vore:  al esam a saran scuasit ducj internis
    Sin. candidât interni
11. adi., s.m. student in medisine o miedi a pene indotorât che al fâs il so tirocini intun ospedâl
    Sin. miedi interni
12. adi., s.m. gjorn. setôr de informazion relative ai events nazionâi, in distinzion cun chei dal forest:  gnovis dal interni