Dizionari de Lenghe Furlane

indicazion  /-òn/  in|di|ca|zi|on  [FO]

1. s.f. il segnalâ, ce che si fâs o ce che al covente par segnâ, in particolâr une strade, une direzion e v.i.:  si metè a cjalâ il tabelon, che cuntun sisteme eletronic al dave indicazions sui trens, oris e binaris (Agnul di Spere, In viaç di domenie); cun tant di cjartine gjeografiche sot dal nâs, cun tant di cartei, e indicazions, a Grivôr i jere tocjade dabon une tâl [di pierdisi] (Franca Mainardis, Grivôr)
   Sin. segnalazion , segnâl
   
   1. il segnalâ cemût compuartâsi, ce fâ e v.i.:  la finalitât ultime des schedis proponudis e je chê di dâ informazions, indicazions di lavôr, sugjeriments pe ricercje e pe costruzion di itineraris di aprendiment (Luigina Di Giusto, Andrea Guaran, Mauro Pascolini, La culine furlane); cumò [il pizighet] al sta dant des indicazions al so assistent, un zovin bassarûl (Checo Tam, Sic transit gloria mundi)
      Sin. istruzion
   2. espression di une sielte, preference, propueste, sugjeriment e v.i.:  la Provincie di Udin e varès di domandâ aes Provinciis di Pordenon e di Gurize di condividi l'obietîf de grafie unificade e di dâ indicazion di personis di meti in Comission (Adrian Cescje, Memoriis di politiche linguistiche)
      Sin. avîs , consei , istruzion , prescrizion , propueste , racomandazion , sugjeriment
   3. espression di une informazion, di un dât, di une carateristiche e v.i.:  une lungje storie, che e rivarà fintremai al 1942, di sôs [di Felix Marchi] segnalazions tal Caselari Politic Centrâl cu la indicazion "Anarchico. Pericoloso" (Donato Toffoli, Felix Marchi, un soversîf te "Grande Vuere")
      Sin. segnalazion , espression , informazion
   4. element che al pues zovâ par studiâ, par dedusi e v.i.:  il studi dai dincj [preistorics] al pues dâ tantis indicazions (Andrea Pessina, Gaetano Vinciguerra, La preistorie in Friûl)
      Sin. informazion , indizi