Dizionari de Lenghe Furlane

istruzion  /-òn/  is|tru|zi|on  [FO]

1. s.f. ativitât indreçade a fâ imparâ nozions e abilitâts:  il stât talian, midiant de istruzion e de comunicazion, al fâs un sfuarç grant (ancje se mâl impuestât) par che in Italie tante part de popolazion e impari l'inglês, ma cence compuartâ la sparizion de lenghe taliane (Sandri Carrozzo, Vuere e pâs - Il conflit linguistic in Friûl jenfri vuere cidine e pâs bausarie)
   Sin. educazion , inscuelament , insegnament
   Var. instruzion
   
   1. setôr de azion politiche e aministrative che si ocupe in particolâr des scuelis e des lôr ativitâts:  i setôrs fondamentâi de politiche linguistiche - istruzion, mieçs di comunicazion e vite publiche (Marc Stolf, Minorancis linguistichis)
2. s.f. risultât dal insegnament:  in zornade di vuê, cence un fregul di istruzion no si fâs un pas di nissune bande (Josef Marchet, Lis predicjis dal muini)
   Sin. culture , educazion
3. s.f. [TS] milit. complès di esercitazions teorichis e pratichis par preparâ i militârs ae azion in combatiment:  a fânus istruzion su la Mont dai Bûs, o vevin un sergjent lunc e sec e il caporâl maiôr, Spolar (Alan Brusini, I universitaris)
4. s.f. indicazion esate su ce che si à di fâ, su cemût che si à di compuartâsi, lavorâ e v.i.:  par presentâ la domande al covente prime prenotâsi sul sît www.comune.udine.it e lâ daûr des istruzions dadis (Marc Stolf, Domandis di acès pal font afits fin ai 28 di Avrîl)
   Sin. consei , indicazion , norme , ordin , recipe
5. s.f. massime tal pl., descrizion tecniche di un ogjet, di un prodot, di une sostance e v.i. e informazion di cemût doprâle:  lis indicazions sul cartelon [dal zûc da la ocje] a son par furlan, lis istruzions a son ancje par talian (Erika Adami, Il zûc de ocje in lenghe)
   
   1. sfuei o librut o altri supuart cun chê descrizion e chês informazions:  sâstu dulà che a son lis istruzions de machine di lavâ?
6. s.f. [TS] inform. comant di un lengaç di programazion par fâi eseguî al ordenadôr une operazion specifiche
   Sin. ordin
7. s.f. [TS] dir. ativitât dal procès là che si cjape sù il materiâl di prove
   
   1. moment dal procès che si davuelç cheste ativitât

Proverbis:

• la istruzion no le mangjin ni lis surîs ni lis gjalinis