Dizionari de Lenghe Furlane

dissegnâ  dis|se|gnâ  [AF]

1. v.tr. (ancje ass.) rapresentâ doprant liniis, segns, e v.i., soredut cun lapis, penis e sim.:  si è voltât viers la lavagne, al à cjapât il zes in man e al à dissegnade une crôs di Sant Andree, un grant ‘x' (Adrian Cescje, Memoriis di politiche linguistiche)
   Var. disegnâ
   Cfr. meti jù , tirâ jù , segnâ , tirâ , ritratâ
   
   1. fâ un progjet tecnic:  il gjornalist al cjalà ancjemò la bocje dal tunel. E veve une biele linie. L'architet che le veve dissegnade nol jere l'ultin rivât (Agnul di Spere, Fieste di inaugurazion)
      Sin. progjetâ
   2. (fig.) rapresentâ, fâ capî o fâ cognossi, ancje no cun segns, ma a peraulis o in altre maniere:  [Catarine Percude] cjalant cui sioi voi pinsirôs à copiât dal vêr la vita dai puars, à dissegnât in tancj cuadruts li bielessis dal so paîs (Ugo Pellis, Catinuta)
      Sin. piturâ
2. v.tr. (fig.) dâ dongje une idee, un concet, ancje complès:  desenis di ricercjis e cunvignis, tesis di lauree e progjets, a cirin di scuvierzi la nestre storie di îr, la nestre culture di vuê e di dissegnâ il Friûl di doman (Walter Tomada, Trop ise furlane la Universitât dal Friûl?)
   Sin. concepî , elaborâ , ideâ , meti jù , progjetâ , creâ , imbastî¹ , pensâ
3. v.tr. (fig.) vê un moviment o une forme che al à une cierte linie o ciertis carateristichis:  il Soreli al è metût tal centri de orbite, che in veretât al è ta un dai centris dal elìs dissegnât da la orbite (Bepi Zefon, Ecuinozi de Vierte)
   Sin. intaiâ , segnâ