Dizionari de Lenghe Furlane

dineâ  di|ne|â  [AF]

1. v.tr. no volê ricognossi, no volê ameti:  la situazion etniche de Furlanie ducj le cognossin di là dal confin, e cul dineâle o scuindile no si le mude e no si le distrûç (Josef Marchet, Ce che a vuelin)
   Sin. refudâ , neâ¹
   Var. deneâ
2. v.intr. dî di no:  al dineave menant il cjâf, di no, di no, come par sostignî lis peraulis (Maria Forte, Cjase di Dalban)
   Sin. refudâ , neâ¹
3. v.tr. ribati alc dimostrant il contrari:  [Ciceri] no si vergogne di proferî cheste grande argomentazion par dineâ che i slovens des valadis de Tor a son slovens, parcè che no clamin "gostilna" la ostarie, ma "ostarija" (Adrian Cescje, Memoriis di politiche linguistiche); l'om nol è iscrit ta la anagrafe, ma nissun po dineâ che da plui di un an nol sei incjasât tal comun, e voie o no voie, al è notât te popolazion provisorie (Pieri Somede dai Marcs, La ultime firme de mê podestarie)
   Sin. bati , contradî , contrastâ , lâ cuintri , neâ¹ , contindi
4. v.tr. no dâ, no concedi, no consintî e v.i.:  al tirave dilunc sbarcjant lunari e cuant che no jerin plui napis di spacâ, nissun i dineave une bocjade di companadi e une fete di polente (Pieri Somede dai Marcs, Spacecjamin); chel fregul di autonomie che si à domandade nus ven ancjemò dineade (Josef Marchet, E se no nus dassin la autonomie); conseis e plasês no jai dinei a di nissun…, se o pues (Alviero Negro, Int di masnade)
   Sin. refudâ , gjavâ , neâ¹
5. v.tr. mudâ dal dut di posizion politiche sociâl, religjose e v.i., bandonant une comunitât, une idee, une cause e v.i.:  al jere lât a vivi intun apartament de capitâl, dulà che al jere paron un universitari che al veve dineât lis sôs lidrîs borghesis, bandonât la famee, e al veve ufiert ricet a cuatri compagns dal so moviment (Carlo Sgorlon, Ombris tal infinît)
   Sin. rineâ , refudâ , neâ¹
6. v.tr. gjavâ il ricognossiment di un leam, spec. di un leam di parintât:  na cristiana di Rioni deneada dai siôs a era zuda a vivi cun lui e la famea a era nassuda cussì e slargjada dopo (Novella Cantarutti, La femina di Marasint)
   Sin. rineâ , refudâ , ripudiâ , parâ vie , mandâ vie , neâ¹