Dizionari de Lenghe Furlane

diference  /-rèn-/  di|fe|ren|ce  [FO]

1. s.f. il no jessi compagn:  si beveve in ligrie e par chel moment no jere diference fra sorestants e lavoradôrs, fra stampadôrs e fruts, fra maltarûi e chei dal for, fra oms e feminis (Pieri Menis, Une letare par Bepo); l'ordenament autonomistic che al rispiete i dirits naturâi, lis diferencis di temperament, di educazion, di lenghe, di cundizions gjeografichis e economichis, al è simpri stât il segret de concuardie (Josef Marchet, La unitât cuintri la unitât); moraliscj di ogni sorta / che i vês pressja e no premura / int di media o di piçula virtût / vuardeans da normadura / il problema a nol è la diferenza / ma la persecuzion / magari cuinçada cul sâl / da vuesta compassion (Giorgio Ferigo, Chel che al impiava fûcs); e jere cuiete. Ce diference di me che o stentavi a stratignîmi (Alan Brusini, Gian Paolo Linda, I forescj)
   Sin. disavualance , disconcuardie , discordance , disparitât , divari , divergjence , diversitât , lontanance , salt¹ , svari
   Var. difarence , disference , diferenzie , difarenzie
2. s.f. detai che al fâs che dôs o plui robis, personis e v.i. no sedin compagnis:  la associazion cul frico di cheste ricete [di Martino da Como] e je avonde gjeneriche e si puedin notâ un pocjis di diferencis (Sandri Carrozzo, Frico un plat furlan cuntun non di origjin foreste); la comparazion fra il sisteme dai neurons spieli intai oms e intes simiis e mostre des similitudins ma ancje des diferencis (Giacomo Rizzolatti, Laila Craighero, Speculazions su la origjin dal lengaç)
3. s.f. [CO, TS] mat. risultât de operazion di sotrazion:  2 al è la diference di 5 mancul 3
   Sin. rest
   
   1. [CO] cuantitât di bêçs che a mancjin par completâ un paiament:  il forment di semence al doveve rivâ da la Toscane: dopo trê dîs al va, al paie la diference di presit, al ritire il sac di forment ben sigjilât (Pieri Somede dai Marcs, Vilie di Nadâl (teatri))
   2. cuantitât di alc che si à in plui o in mancul:  vadì Line no lu varès nancje volût [maridâ]: a vevin vincj agns di diference (Roberto Ongaro, Cretevierte)
4. s.f. il contindi par ideis, interès e v.i.:  po dopo zelosiis, diferencis, mustics… une robe sù par jù come fra madone e brût (Antoni Beline, Pre Pitin)
   Sin. contrast , radi , incomprension , barufe , discussion , dissidie

Polirematichis e espressions idiomatichis

• a diference di loc.prep.
• fâ diferencis loc.v.

Proverbis:

• dal dâ al vê e passe une biele diference
• l'amôr nol cjale diferencis