Dizionari de Lenghe Furlane

di cariere    [CO]

1. loc.av. in maniere improvise, svelte, in pôc timp:  nancje la man dal veterinari, rivât di cariere cul so biroç, no veve zovât a salvâ il vidiel (Gianni Gregoricchio, Îr e doman); Cjandit si butà di cariere jù pe rive (Josef Cjargnel, La gnot di Sant Cjandit)
   Sin. subit , subite , daurman , di bot , di corse , di bote , a sec , a colp , a colp sec , di buride , tic e tac , bot e sclop , a la improvise , a bot e sclop , di bot e sclop , dal improvîs , a ruede lavade , di cariere vierte , di strade
2. loc.adi.inv. [BF] di plui elements, che a formin une serie cence interuzions:  za agns, ai colonos che a vevin fat tresinte o cuatricent anadis di cariere sot un paron, simpri ta chê cjase, simpri sun chei cjamps, simpri ta chê stale ur àn vût dât une medaie di ricognossiment (Riedo Pup, I furlans e i parons)
   Sin. di file , in rie , un daûr di chel altri
3. loc.adi.inv., loc.av. che al fâs alc par profession, par lavôr paiât e cun prospetivis di cressi di mansions e di paie:  vuê i socis de Ana a calin parcè che i militârs di cariere no son plui cussì tancj come chei di jeve (Walter Tomada, I Alpins sono furlans o talians?)
   
   1. (fig.) che al fâs alc in maniere seguitive par convenience:  la prevalence di un partît o di chel altri, di une criche di diestre o di çampe […] e varà impuartance pai caporions des fazions e pai lôr tirepîts di cariere (Josef Marchet, Il fiar dal ciroic)

Components:

• cariere s.f.