Dizionari de Lenghe Furlane

colade¹  /-à-/  co|la|de  [AF]

1. s.f. il colâ, il lâ jù par fuarce di gravitât:  la colade [cul parecjadudis] e deventà plui dolce. Al fo scuasit un dandanâsi tal aiar, un sintîsi cence pês come in cualchi sium (Maria Forte, Cjase di Dalban); cul bot de colade il len de crôs, za frait, al jere lât in flichignis (Pieri Menis, Il Signôr sul mûr de braide)
   Sin. cjadude , sdrumade
   
   1. il colâ par tiere par vie di vê pierdût l'ecuilibri:  cui che nol è stât sul Mia nol à une idee. No si cjamine ni par tiere, ni sul cret, ma sui lens, sui ramaçs colâts e lâts fraits. Une fadie di chês! […] E su la ponte o ti cjatìn il colonel […]. Propit li ret o ai fate la mê milesime colade (Alan Brusini, I ribei); lis voris di cjase a son la cause plui grande di incidents: coladis, fraturis, feridis, brusaduris… (Guglielmo Pitzalis, Ocjo ai vues!)
      Sin. pirule , furcjumite , marcule , rodolon , rondolon , sbrissade , sbrisson , sdramassade , sdrumade , strassunide , strucje , svol , tarombule , tombolade , voltolon
2. s.f. (fig.) il cessâ di vê fuarce, validitât, resistence, esistence e v.i.:  [i Ostrogôts] dopo de colade dal imperi roman, a vevin tornade a meti in sest avonde ben lis robis (Francesc Placerean, La vite no je cuintriposizion di valôrs ma armonie di realtâts complementârs); o continui ancjemò a clamâle cussì. DDR. O soi restât fer a prime de colade dal mûr (Checo Tam, La maree nere)
   Sin. cjadude , sdrumade , fin²
3. s.f. (fig.) il lâ jù di cuantitât, intensitât, valôr o sim:  un disalineament dai nivei eletronics fra i materiâi che a formin la cele che al compuarte une colade di tension dentri la cele (Lorenzo Marcolini, Lis celis organichis nanostruturadis)
   Sin. cjadude , crac² , sdrumade , câl , calade , diminuzion , sbassament
4. s.f. cuantitât di robe che e ven jù o che e je picjade, e pindule o sim.:  si jere fermade denant de Madone, che e someave vive sul trono lusint, tal sflandôr des cjandelis impiadis, come une regjine di flabe, cun chê colade di aur che i ricamave il vistît di sede blancje dal cuel fin a la cinturele (Pieri Menis, Chei di Muraie)