Dizionari de Lenghe Furlane

cerce  /cè-/  cer|ce  [AF]

1. s.f. il provâ alc di bevi o di mangjâ:  agnorums di studis, ricercjis, provis e cercis [di sgnape] (Dree Venier, Giannola Nonino: une rivoluzion partide des lidrîs); [i foncs] jai doi simpri prin di cerce al gjat, par no vê sorpresis (Angelo Covazzi, Foncs); stant a sarvî li dal cont, i veve puartade juste di cerce al paron une luianie (Ivano Urli, Indulà isal il manicomi?)
   Sin. degustazion , prove
   Var. cercje
2. s.f. piçule cuantitât di robe di mangjâ o di bevi:  «Vûstu un bocon?» […] «Ben, une cerce ma nome une cerce, savêso…» (Meni Ucel, I macarons)
   Sin. cercin¹ , fregul , fruçon , got , gote¹ , ninin , sclip , tic¹
3. s.f. [TS] tecn. operazion fate su cierts materiâi o terens par capî la lôr nature o la lôr cualitât
4. s.f. (fig.) piçule cuantitât rapresentative, probatorie o preditive di alc, sedi materiâl che imateriâl:  e cheste, par intant, e je nome une cerce: il biel al vignarà plui indenant, se lis cjossis a van par chê strade che a son inviadis (Josef Marchet, Sovranitât nazionâl); lotâ par dâ al nestri popul une cerce di chê liberazion, che le viodevin ancje te concuiste dai dirits plui sempliçs dal lavôr a cjase nestre, de apartignince a une culture e a une lenghe (Adrian Cescje, Memoriis di politiche linguistiche)
   Sin. cercin¹ , tic¹ , sclip , ninin , gote¹ , got , fruçon , fregul , campion