gote1
/-ò-/
go|te
[FO]
-
s.f.
piçule cuantitât di un licuit che al è daûr a colâ, di forme plui o mancul taronde:
Eliseo al implenà di aghe il bussulot parsore la muele e al vierzè il rubinet par fâ colâ jù une gote a la volte (Carlo Sgorlon, Prime di sere);
i ramaçs crots come mans neris cun gotis di rosade che a slusin tal soreli (Alan Brusini, Gian Paolo Linda, I forescj)
-
ognidune des particulis di aghe che a fasin la ploie:
o jeri a pene rivât li de strade basse di Pavie che la ploie e tacà cun gruessis gotonis (Checo Tam, La codebuie)
-
s.f.
forme a ponte di une bande e staronzade e gruesse di chê altre:
un diamant taiât a gote
-
s.f.
[CO, TS]
farm.
unitât di misure par dâ di cjoli medisinâi, di uns 50 miligrams di soluzion di aghe o 40 di soluzion alcoliche, che si oten cul contegotis:
al veve cjolt cuarante gotis di opi intune tace di aghe (Franc Fari, Il cjâf dai furlans)
-
medisine dade in chê forme:
Vigji Trep, che dopo i otante al à scugnût cjoli lis gotis, lis contave une par une fin la ultime (Riedo Pup, I furlans e lis medisinis)
-
s.f.
(fig.)
cuantitât piçule o avonde piçule di licuit, ancje cence riferiment ae forme:
Judite che e à cjolt tal armâr une butilie, i met cualchi gote tal lat e cafè (Pieri Somede dai Marcs, Un pugn di moscjis);
Ca, pre Nocent, che al bevi une gote! (Arturo Feruglio, Viaç a Vignesie)
Sin. got
, sclip
, lagrime
-
ancje di entitâts astratis, cuantitât minime:
no sin contents des limuesinis dadis a gotis par interessament di cualchi parlamentâr (Josef Marchet, No sin contents!)
-
s.f.
buse par dulà che un licuit al passe in piçule cuantitât:
comedâ il cuviert se la canaie lu butave par aiar cul lâ a nîts di passare, stropâ lis gotis (Josef Marchet, Lis predicjis dal muini);
il tet, vieri come che al jere, al veve masse gotis par comedâlu (Lucio Perès, Il mâl dal mûr)
Proverbis:
- e je la ultime gote chê che a lasse il savôr in bocje
- e tire plui moscjis une gote di mîl che no un barîl di asêt
- gote spesse e fore il clap
- il bon formadi al è chel cu la gote
- la gote continue e sbuse la piere
- la gote continue e svuede il vassiel
- miôr bevi une bote che no spandi une gote
- ogni gote e cuince un fasûl
- une gote di fêl e fâs amâr un grant pitêr di mîl
- une gote di sinç e vuaste un pitêr di mîl