Dizionari de Lenghe Furlane

valê  va|lê  [FO]

1. v.intr. vê efiet, fuarce logjiche, juridiche o di altre sorte che si pues aplicâ:  l'articul 6 de Costituzion al vâl par dutis lis minorancis in maniere compagne (Marc Stolf, Rai e furlan: la Italie e je «una e incorreggibile»); no mi cjati ben cun dute la int. Mah! Al è un discors che al vâl un pôc par ducj… però tal gno câs… (Checo Tam, La maree nere); ogni dì une novitât, mil comandaments: ancje l'avocat al finìs cul capî nuie e jo mancul di lui: cuale leç valie? chê gnove o chê vecje, cui lu sa (Pieri Somede dai Marcs, L'avocat e la luianie)
   Sin. contâ
   
   1. di monede, vê cors:  «A àn dit just», i dîs il scrivant. «A son plui di trê agns che chê cjarte alì no vâl plui» (Meni Ucel, La vacje)
2. v.intr. dâ un efiet positîf, un vantaç, sei di jutori:  ce valial mo il nestri lambicâsi, il nestri scombati se dut al va come che al vûl? (Alan Brusini, Par stradis lungjis); un dei fradis di jê, om di judizi e brâf ne la pescja (e chel che plui vâl, furtunât) al veva mitût di banda cul so lavôr cualchi carantan (Federigo Comelli, Il me paîs); zornadis a passarin fra discori, preâlu e vaî, tant di sô mari che di Lise, ma nol valè nuie (Roberto Ongaro, Il muc)
   Sin. zovâ , contâ , judâ
   
   1. vê un ciert podê, une cierte fuarce, une cierte proprietât:  al jere il lat di Ane che, in chel an, nol valeve; e il frut al jere palit come tirât sù tal scûr (Maria Forte, "Nossent")
3. v.intr. vê il stes valôr, no compuartâ nissune diference:  l'incjant e il misteri dal amôr a jerin ducj intîrs in ogni femine e, in cualchi mût, Mafalde e valeve Geneviève (Carlo Sgorlon, Il dolfin)
4. v.intr. vê un ciert valôr, ancje cuantificât in misure economiche:  a àn campagne, che vuê - ducj lu san - e vâl centenârs di milions (Riedo Pup, Jessi miliardaris e no savêlu)
   
   1. vê un bon rapuart tra il presit e la cualitât:  "Vincjecinc francs!?" […] al tornà a provâlu doi pas, po al pensà che [il cjaruç] ju valeve ben, sì, chei bêçs (Dino Virgili, Il cjaruç dai Bas)
      Sin. meretâ
5. v.intr. vê un ciert valôr, une impuartance, ancje no cuantificade a bêçs:  al vâl plui un amì che cent parincj (Luciano Rocco, La foghere); i comandants - i scriveve so pari - a capissin nome la lôr: par cjapâ une culine a son bogns come nuie di riscjâ un zovin. No san, lôr, un om ce che al vâl (Riedo Pup, Dreute); al voleve dispiticâsi a passâ dongje i fîs dal vecjo paron, fasint fente di no inacuarzisi di lôr. Fâur capî che no valevin il so salût… (Maria Forte, La tiere di Lansing)

Polirematichis e espressions idiomatichis

• fâ valê loc.v.
• fâsi valê loc.v.
• tant vâl loc.
• vâl a dî loc.coniun.
• valê la pene loc.v.
• valê la spese loc.v.
• valê tant aur che si pese loc.v.

Proverbis:

• a valin plui i fats che no lis cjacaris
• a valin plui i fats che no lis peraulis
• al vâl plui il baston di un pastôr che no la medisine di un grant dotôr
• al vâl plui il cûr content che no dut l'aur di chest mont
• al vâl plui il cûr content che no pan di forment
• al vâl plui il vueli che no la lum
• al vâl plui un a fâ che no cent a comandâ
• al vâl plui un amì che no cent parincj
• al vâl plui un asin di pevar che no un fîc di mus
• al vâl plui un bon consei che no une borse di bêçs
• al vâl plui un campanel di gnot che no un campanon di dì
• al vâl plui un ducât che no trê liris
• al vâl plui un gran di pevar che no une balote di mus
• al vâl plui un lusôr denant che no cent daûr
• al vâl plui un mus vîf che no un dotôr muart
• al vâl plui un no cun creance che no un sì vilan
• al vâl plui un pan sudât che no une man di chel robât
• al vâl plui un pan taront che no un mus in taule
• al vâl plui un plat di biel acet che no un plat di rost
• al vâl plui un plat di biele ciere che no un plat di rost
• al vâl plui un plat di bon acet che no un plat di rost
• al vâl plui un porco ben metût che no cincuante pater
• al vâl plui un porco ben metût che no un pater mâl disût
• al vâl plui un sì che no un ma lafè sì
• al vâl plui un solt in soreli che no in ombrene
• al vâl plui un uciel in man che no cent par aiar
• al vâl plui un vicin vicin che no un fradi lontan
• cjaval cence vizis nol vâl nuie
• cuant che al è destinât no vâl ni miedi ni medisine
• cuant che e je la sô ore, nol vâl nuie dî di no
• cuant che il poç al è sut, si sa trop che e vâl la aghe
• cuant che la piore e à fat il mâl, par chel che e vâl e crepe
• cui che al laude se stes nol vâl un ves
• cui che al ten cont di un fulminant nol vâl un fulminant
• cui che nol rispiete se stes nol vâl un ves
• cui che nol sa nuie nol vâl nuie
• cui che nol ten cont di un centesim nol vâl un milesim
• cui che si laude nol vâl un bêç
• cuintri la fuarce no vâl reson
• di ca a cent agns al vâl tant il lin che la stope
• di carnevâl ogni mat al vâl
• e vâl plui la cite viere che no la gnove
• e vâl plui la fieste in famee che no la sagre dal paîs
• e vâl plui la pratiche che no la gramatiche
• e vâl plui une fete di polente cuiete che no une spanzade maladete
• e vâl plui une ore di ben che no cent di mâl
• e vâl plui une ore di ligrie che no cent di malinconie
• e vâl plui une ploie te sô stagjon che no un tesaur buzaron
• e vâl plui une rose frescje che no un scovul
• femine cence gracie pôc e vâl tant che la mignestre cence sâl
• i rîs par che a sedin bogns a àn di valê un solt dal un
• il cjaval al crepe co al à mangjât par tant che al vâl
• il sì che o dîs vuê al à di valê ancje doman
• il vin trat e bevût al vâl un scût
• impare la art e metile de bande, il timp al vignarà che la art e valarà
• l'ûf fat e bevût al vâl un scût, l'ûf fat e mangjât al vâl un ducât
• la peraule e je chê che e vâl
• lis robis fatis in presse no valin une vesse
• nol vâl jessi conts e no vê ce contâ
• nol vâl sierâ la stale co a son stâts robâts i bûs
• nol vâl sunâ pal timp co al à za scomençât a tampiestâ
• nol vâl tignî sierade la spine se il vin si spant pal cjalcon
• nol vâl vaî là che nol è rimiedi
• nol vâl vendi il cjôt par comprâ il purcit
• siums e ves a valin chel istès
• spaçâ la monede par chel che e vâl
• un cjâf cence lenghe nol vâl nuie
• une dì e vâl un an
• une robe par fuarce no vâl une scuarce
• une volte plui valeve cui che lungje le saveve, cumò al vâl ogni cretin che al à plen il so tacuin