zovâ
zo|vâ
[FO]
-
v.intr.
ancje impers., puartâ vantaç, benefici, sedi par un fin specific che in gjenerâl:
"No stâ invelegnâti, ti fâs mâl, e tant nol ti zove nuie" "Al zove sì, al zove ancje il sbrocâsi […]" (Pieri Somede dai Marcs, Un pugn di moscjis);
o savìn vivi cun ducj chei altris, ma cun serietât, stant al pas cui timps che a cambiin. E chest al zove se tu âs di tignî dongje un grup di zovins intune scuadre (Christian Romanin, Dino Zoff: «O vin lidrîs buinis, o vin di tignîlis di cont»);
si jere in timp di vuere, si sa, se i zove a cualchidun, pai puars e je une disgracie orende (Antoni Beline, Pre Pitin)
Sin. lâ ben
, fâ ben
-
fâ ben ae salût:
dome Jacum Capucjo lu slengave e al diseve […] che al jere un çarlatan, …che i siei potacjs a zovavin come il zucar… sui gnotui (Maria Forte, Il Bide di Miot);
nissune medisine e zovave, il so cjâf indebilît al jere simpri fis intun pinsîr lontan (Pieri Somede dai Marcs, A jerin lagrimis)
-
vê un ciert efiet o permeti di rivâ a di un ciert obietîf:
li pinii dai fassalets butâts sù in cima il cjâf colm di streci, a zovavin a dâi un estru galandin (Novella Cantarutti, La femina di Marasint);
il soreli al jentrave ad in plen te sale dal Valmontane, ma nol zovave a scjaldâ la atmosfere dal ambient (Alan Brusini, Gian Paolo Linda, I forescj)
Cfr. rivâ
-
v.intr.
jessi necessari:
zovial dî che di misdì aes trê a son nome trê oris? (Alan Brusini, Par stradis lungjis)
Sin. servî
, coventâ
Proverbis:
- ce i zovie la robe al ignorant co nol po comprâ il savê?
- ce zovial volê ce che no si po vê?
- cuant che no zove la reson, si dopre il baston
- la robe ce i zovie al ignorant se nol po cuistâ il savê
- nol zove predicjâ se esempli no si da
- nol zove sunâ daspò stade la tampieste
- nol zove sunâ daspò tampiestât