Dizionari de Lenghe Furlane

servî  ser|vî  [FO]

1. v.tr. (ancje ass.) assisti e ubidî a cdn. lavorant intun rapuart di subordenazion, ancje in mancjance di libertât personâl:  [Carli] al siervì une vore di parons parcè che al murì vecjon; e al podè viodi cui siei voi centenârs di nobii, in volte, a cene tal cjistiel, o pûr a cjace tal parc, su lis culinis (Riedo Pup, I furlans e il cjistiel); Nene e veve stât ancje a servî a Vignesie e Milio al veve vût fat il cucjar dal cont Moscjin (Roberto Ongaro, Cretevierte); tal mil cuatrisent e setantasiet, doi mil fantats furlans di ca da la aga a son stâts cjapâts dai Pagans e puartâts via. A servîju, capîsu?, a servîju, lontan di ca, da la sô cjera, par duta la sô vita (Pier Paolo Pasolini, I Turcs tal Friûl)
   Var. siervî , siervi
2. v.tr. (ancje ass.) lavorâ par cdn. o par une istituzion cun mansions che a domandin rispiet de jerarchie, ubidience, fedeltât:  i malcontents si ju contave sui dêts e ducj a vevin il lôr parcè: uficiâi che a vevin servît Napoleon, e la Austrie no veve volût cjapâju (Josef Marchet, Cuintristorie dal Friûl fin sot la Italie)
3. v.tr. furnî un servizi, spec. midiant di une distribuzion o un traspuart:  il paîs nol è servît dal tren, ma a son lis corieris
4. v.tr. puartâ in taule robis di bevi o di mangjâ:  ogni tant [il brigadîr] al vignive ancje par cjase: i Lanzins, tal tinel, si sentavin ator di lui; Nita e siervive il cafè neri, un pôc spaurose (Dino Virgili, La aghe da pît la cleve)
   
   1. dâi a di un che al è sentât in taule di mangjâ o di bevi:  [il nono] al mangjave di bessôl intun dai tinei lontans de cusine, e […] Eme i steve intor, pronte a servîlu (Carlo Sgorlon, Il dolfin)
   2. lavorâ tant che camarîr o camarele tun ambient:  a van a servî tai locâi par cjatâ di lâ a marît e no par fâ il mistîr dute la vite (Alan Brusini, Par stradis lungjis)
5. v.tr. sodisfâ il client in ce che i covente:  ducj a pretindin, ducj a vuelin jessi servîts i prins se no ti fasin tant di muse (Pieri Somede dai Marcs, Une scarpute)
6. v.tr. [TS] sport (ancje ass.) intai zûcs di scuadre, passâ la bale:  Widmer al servìs un balon golôs pal cjâf di Perica, che lu mande fûr di un et (Marc Stolf, Roma - Udinese 2-1)
   Sin. passâ
   
   1. in sports tant che il tenis o il volley, tacâ un scambi butant la bale al aversari
   2. zûcs dâur lis cjartis ai zuiadôrs par che a tachin la man
7. v.intr. jessi util, fâ une funzion:  antigaiis, mufis, balis, che par solit a servissin nome a scuindi sot vie altris interès che no van pandûts (Josef Marchet, Preambul rusin); le faserin passâ intune stanziute inmufide che e servive di sale di spiete (Roberto Ongaro, Il muc); si durmive su lis sentis e la manteline nus servive di cussin (Pieri Menis, La setemane rosse)
   Sin. coventâ , zovâ
   Cfr. fâ
8. v.intr. funzionâ:  al jere ridusût che no siervive nancje il cjâf plui (Riedo Pup, Caposassi)
9. v.intr. jessi necessari:  «Se i ocoressin patatis, chês si podarès cumbinâ […]» «Nie di fâ galantom […] mi servive forment, al sarà par une altre volte, us saludi» (Alan Brusini, Il colôr dal marcjât)
   Sin. coventâ , ocori

Polirematichis e espressions idiomatichis

• lâ a servî loc.v.
• servî il Signôr loc.v.
• servî in barbe e piruche loc.av.
• servî la patrie loc.v.
• servî messe loc.v.

Proverbis:

• bisugne tignî cont cuant che a 'nd è, che cuant che no 'nd è nol servìs a nuie
• cuant che nol servìs il cjâf, a servissin lis gjambis
• cui che al servìs Diu al à un bon paron
• cui che al servìs doi parons nol servìs nissun
• cui che al servìs il comun nol servìs nissun
• cui che al servìs l'arbul al mangje il pom
• il pan di servî al à siet crostis e bisugne rompi i dincj par mangjâlu
• la man drete e servìs la çampe
• nissun nol po servî doi parons
• no si po servî doi parons
• puar cui che al servìs, ma puar ancje chel che al scuen fâsi servî
• un cjâf cence lenghe al servìs par maçuele