Dizionari de Lenghe Furlane

spindi  spin|di  [FO]

1. v.tr. (ancje ass.) doprâ i bêçs dantju in cambi di un ben o di un servizi:  in Gales [pe lenghe galese] a spindin 20 milions ad an, cence nancje contâ lis spesis de scuele che a van par un altri cont (Sandri Carrozzo, L'Antifurlan); la robe e sarès stade masse complicade par vie che si varès scugnût cambiâ la leç e si varès spindût un voli dal cjâf in cjartis e pratichis (Riedo Pup, I furlans e i predis); inte valîs a menarin cun se alc di mangjative, par tignîsi indaûr sul spindi (Gianni Gregoricchio, Trê feminis)
   Sin. dâ fûr , meti fûr , paiâ , sborsâ , spiçâ fûr , tirâ fûr , slungjâ
   
   1. v.intr. fâ la compre, lâ a comprâ alc, spec. di mangjâ o ce che al covente pe cjase:  a i disè a Gjovanata vignuda a domandâi bêçs par zî a spindi: «I na 'nd ai pi.» (Novella Cantarutti, La Santa); la femine, Lotte, tornant di Arth, che e jere stade a spindi, metût vie l'auto, denant dai trê fîs i veve dite che no i smecave masse di deventâ viele in chê maniere (Agnul di Spere, Frêt)
2. v.tr. impegnâ timp, energjiis, peraulis o une cualsisei risorse:  al jere convint che la sô e fos une mission di ben. Valevie mo la pene di spindi une vite cussì? Jerie pardabon une mission? (Pieri Menis, Sul agâr); i prins vincj agn dal II secul devant di Crist a forin spindûts dai Romans a cjastiâ chest popul [i celtis] (Josef Marchet, Cuintristorie dal Friûl fin sot la Italie); pitimâsi su robis che no valevin spindi peraulis (Maria Forte, Cjase di Dalban)
   Sin. meti , doprâ , impleâ

Polirematichis e espressions idiomatichis

• spindi e spandi loc.v.
• spindiju ducj loc.v.

Proverbis:

• al è miôr spindi in pan che no in medisinis
• atindi, intindi e no spindi
• bisugne spindi seont lis fuarcis
• bisugne spindi simpri un solt di mancul di chel che si vuadagne
• ce che si spint mâl si jal robe al so capitâl
• cui che al à bêçs al po spindi
• cui che al à e che al spint nol à bisugne di tacuin
• cui che al spint pôc al spint trop
• cui che plui al spint mancul al spint
• cui che plui ind à plui int spint
• cui che pôc al spint pôc al gjolt
• i bêçs a son fats par spindi
• i bêçs bisugne savêju spindi
• miôr spindi in pan che no in medisine
• no spindi dut ce che si à ni dî dut ce che si sa
• nol baste vê bêçs, bisugne savê spindiju
• pôc si spint e pôc si gjolt