Dizionari de Lenghe Furlane

simpri  sim|pri  [FO]

1. av. par dut il timp, in assolût o par dut il timp prime di un ciert moment o dopo di un ciert moment o di cumò indevant:  Diu al è simpri di là di cualunche rispueste, e nô no podìn dâle (Francesc Placerean, Il popul furlan al à ancjemò nostalgjie des robis bielis e santis); e je stade simpri cussì: cui che al varà pierdût al varà di tignî ancje la colpe (Riedo Pup, Al jere une volte il furlan); cussì si salvà, ma dopo lu àn clamât simpri Toni mat (Andreina Nicoloso Ciceri, Toni Mat - Racconti popolari friulani I); nô o murarìn e po a muraran nestris fîs, ma chê cjante e restarà simpri vive, intate (Dino Virgili, La aghe da pît la cleve)
   Sin. salt²
   Var. sempri , simpi
   
   1. no dome in sens cronologjic, in ogni ocasion, in ogni câs, in ogni eventualitât:  jo o fevelarai simpri par furlan, in sede informâl e in sede formâl in Consei diretîf (Adrian Cescje, Memoriis di politiche linguistiche); chel che al scolta [lis cjançons] nol cjatarà simpri il corispuindint in ce che al lei (se al scolta e lei insieme [il test des cjançons]) (Giorgio Ferigo, In forma di peraulas…)
2. av. in maniere ripetude, usuâl o continuade:  parcè dopristu simpri chestis brutis peraulis? (Checo Tam, Sense); «A misdì pes ostariis o comandi simpri un plat di lidric e pomodoro» (Carlo Sgorlon, Prime di sere); meti un tic di brût a la volte, e simpri messedant fâ cuei (Giorgio Pascoli, Il Litum: jerbis salvadiis te cusine)
   Sin. salt²
3. av. cuntun sens di progression:  e cjalave mont Spiç che i steve cuintri, e i pareve che al les vie simpri sbassantsi (Catarine Percude, La fuiace de Madone); il cîl si fâs simpri plui scûr e al va a riscjo di montanâ (Pieri Somede dai Marcs, Butìnle in staiare); intant lis robis no cambiavin. Pitost a levin simpri piês (Alan Brusini, Alpin jo mame!)
   Sin. a man a man , par ordin , salt²
4. av. ancjemò:  "[…] Al è un pieç che [Guido] al no si fâs viodi. Lavorial simpri in Preture?" (Sandri Di Suald, Ah! la provincie)
   Sin. ancjemò , inmò , salt²
5. av. par dâ plui enfasi a une ipotesi:  o studiarai jo la situazion e o cjatarai ogni pretest par contentâti; ben intindût cence fa stupideçs e simpri se no tu volarâs fâju ancje tu (Costantino Smaniotto, Co l'amôr al cimie)
6. av. par dâ plui enfasi a une concession, esclusion, precisazion o a une aversative:  par altri, simpri restant contrari, cumò al taseve e nol olsave plui a dâi chês menadis che i dave prin (Roberto Ongaro, Il muc); a planc a planc, la cussience e sta jentrant ancje tai insiums - un teritori proibît fin a pôc timp indaûr. Simpri sperant che chest fat gnûf al vegni doprât par un bon fin (Franc Fari, Il cjâf dai furlans)
   Sin. purpûr , istès , in ogni câs , in dut câs

Polirematichis e espressions idiomatichis

• plui che simpri loc.v.
• plui di simpri loc.v.
• pûr simpri loc.av.
• saludâ par simpri loc.v.
• simpri che loc.coniun.
• simpri indenant loc.av., loc.adi.inv.
• simpri indevant loc.av., loc.adi.inv.
• simpri intune loc.av., loc.adi.inv.
• simpri plui loc.v.
• simpri se loc.coniun.
• simpri sot loc.av., loc.adi.inv.

Proverbis:

• a fasin simpri il mâl plui grant di ce che al è
• a muerin simpri i plui bogns
• a paiâ e a murî, al è simpri timp
• a tignî i dincj denant de lenghe, al è simpri un bon consei
• a tignî i dincj sierâts in bocje, al è simpri un bon consei
• al è simpri ben di vê te sachete un carantan di stupit
• al è simpri ben di vê te sachete un solt di savût
• al è simpri mieç mont di vendi
• al plui indeul i tocje simpri di cjapâlis
• al sta simpri il ben vicin dal mâl
• al sta simpri il mâl vicin dal ben
• che al sedi cjalt che al sedi frêt, cui che al à di bevi al à simpri sêt
• chei che a vain e àn simpri reson
• cjapon al è simpri bon
• cuant che si vûl bastonâ, si cjate simpri un len
• cui che al piert al à simpri tuart
• cui che al scolte nol à mai tuart, cui che al fevele al po simpri falâ
• cui che al zure simpri al è bausâr
• cui che nol po al stente simpri
• cui che simpri al lavore al è segn che al vûl lâ in malore
• Diu nus vuardi simpri dal sut
• dret o stuart un om al è simpri om
• fruts e colomps a puartin dongje simpri alc
• gjoldi simpri fin che si po, no i mancje mai timp al patî
• i afârs in grant a son simpri contrastâts
• i confronts a son simpri odeôs
• i fruts e i mats a àn simpri l'agnul custodi a vuardâju
• i testarts le vuelin simpri a lôr mût
• il ben al è simpri ben
• il bevon al fevele simpri di vin
• il brigant e il viandant a stan simpri cu la pôre
• il curt al è simpri in ponte
• il diaul al caghe simpri tal grum grant
• il diaul al cjie simpri sul grum plui grant
• il dopli fant al è simpri incostant
• il mâl al è simpri mâl
• il mâl al va simpri pai malâts
• il mont al è simpri biel par cui che lu sa cjoli
• il muart al à simpri tuart
• il mulin dai confuarts al è lât simpri in malore
• il mus al è simpri mus
• il peçotâr al va simpri cun dôs bisacjis
• il prin pinsîr al è simpri il miôr
• il puar al à simpri tuart
• il puar al è simpri puar
• il trop al è simpri trop
• il vier al tache simpri il miluç plui bon
• il vier al tache simpri il pom plui bon
• in cjase dai poltrons e je simpri fieste
• la aghe a va simpri al mâr
• la aghe no cor simpri par chel agâr
• la done pitinine a pâr simpri zovenine
• la falsetât e à il tabâr curt, par tant che e ciri di taponâsi, i reste simpri cualchi part scuvierte
• la femine dal lari no rît simpri
• la femine dal mulinâr e ten simpri un biel gjalinâr
• la glesie e je simpri plui piçule dal tor
• la lune no je simpri taronde
• la muart e à simpri la sô colpe
• la piore fûr dal trop e je simpri triste
• la robe e je simpri buine cuant che si à fam
• la sperance e je simpri verde
• la suste simpri tirade e piert la fuarce
• la tampieste e cole simpri sui cjans magris
• la triste jerbe a cres simpri
• lavorâ come che no si ves di murî mai, vivi come che si ves di murî simpri
• lavorâ come che si ves di vivi simpri, preâ come che si ves di murî daurman
• lis cuaiis no corin simpri par un agâr
• lis cuaiis no van simpri par chel agâr
• lis disgraciis a stan simpri prontis tant che lis taulis in ostarie
• lis tristis gnovis a son simpri veris
• lis tristis gnovis a van simpri indenant
• lis tristis pioris a son simpri fûr di trop
• lunc o curt, un baston al è simpri un baston
• miôr laris ogni un tant che no mantignî simpri il cjan
• neâsi simpri ta la aghe grande
• no si po puartâ simpri la mascare
• nol è vêr amì chel che simpri al dîs di sì
• pai poltrons e je simpri fieste
• pan, gaban e fen a stan simpri ben
• par fâ une fote al è simpri timp
• par no deventâ splantâts, bisugne sei simpri tirâts
• par seren che al sedi il cîl, al è simpri un bâr di nûl
• par tuart o par reson al è simpri mâl lâ in preson
• pari e paron a àn simpri reson
• parsore il nûl al è simpri seren
• robe cjatade, simpri tornade
• sartôrs e cjaliârs a son simpri bausârs
• se si à di inneâsi, lâ simpri ta la aghe grande; no je nancje braùre a inneâsi intune tace di aghe
• si à simpri di lâ vie cun doi solt di mincjon te sachete
• si crôt simpri ce che si brame
• si fâs simpri cence di ce che no si à
• si urte simpri in chel dêt che si à mâl
• si vîf simpri cu la muart a la gole
• simpri al stente cui che no si contente
• sul ultin dal marcjât si à la robe simpri a plui bon presit
• tal troi simpri batût no ven sù jerbe
• un solt di coion al sta simpri ben te sachete
• un solt di pote al sta simpri ben te sachete
• une vacje sporcje e cîr simpri di sporcjâ chê altre
• vegnie tarde la Pasche o a buinore, di là a durmî daspò gustât e je simpri ore