Dizionari de Lenghe Furlane

rilêf¹  ri|lêf  [AF]

1. s.m. struture o forme che e da insù o infûr rispiet a une superficie:  [la mascare] no veve scuasi nissun rilêf, gjavadis lis busis dai voi e une bocje mieze vierte che no si saveve se e rideve o e zigave (Spirt Anonim, Eracsam)
   
   1. prominence dal teren, sedi di piçule che di grande altece, tant che un cuel o une mont:  la descrizion di un percors a pît di Spilimberc ai rilêfs di tiere che a van jù fin te grave dal Tiliment ("muculis" te fevelade di Spilimberc) (Dree Venier, s… BIT 2010); tu âs un zûc di monts e la valade: une viste maraveose, grandiose, plene di rilêfs e di colôrs svareâts (Lelo Cjanton, Lauc)
      Sin. alture , cuel² ipon. , mont¹ ipon. , montagne ipon.
2. s.m. [TS] art tecniche e opare di sculture li che lis figuris a dan insù rispiet a un fonts:  cinc rilêfs cun figuris dal Gnûf Testament (Bepi Agostinis, Storie de art in Friûl)
3. s.m. il jessi rilevant, impuartant, interessant:  edificis di rilêf internazionâl (Erika Adami, I segrets de vite tun zermuei di tiere di cjamp)
   Sin. impuartance , interès , pês¹ , puartade , rilevance , risalt , spic² , rimarc
4. s.m. complès des operazions par cjapâ sù misuris, dâts e v.i.:  sul asfalt al jere restât il segn di une frenade di 80 metris. […] I polizais a vevin fat i lôr rilêfs (Agnul di Spere, Frêt); i rilêfs [su la presince di uciei] a son stâts fats doprant un metodi sientific oportun, par ognidun dai doi boscs, ogni mês par 24 mês consecutîfs (Gianluca Rassati, Ancje intai boscs di mont e je une buine variabilitât di speciis di uciei)
   Sin. rilevazion
5. s.m. osservazion fate par criticâ o par miorâ alc:  mi maravei […] che il Guvier nol vedi tignût cont dai rilêfs fats a so timp dai rapresentants des minorancis e dal Comitât ministeriâl di aplicazion de 482/99 (Anna Bogaro, Contrat Rai)