Dizionari de Lenghe Furlane

râr  râr  [FO]

1. adi. dificil di cjatâ, no comun:  e puartave in cjase robe rare, di presit (Maria Forte, Cjase di Dalban)
   
   1. che al capite cun pocje frecuence:  un lavôr e un pagnut par mantignî la famee al jere râr cjatâlu e ai puars oms, tornâts dal front, ur tocjave cjapâ sù il sac e lâ pal mont (Francesc Placerean, Cuintristorie dal Friûl dal 1866 fint in dì di vuê); Turo, simpri ben vistût e inscarpât, che juste cualchi rare volte al meteve un pâr di bregonats par lavorâ tal ort (Dino Virgili, La aghe da pît la cleve); «Di ce si tratial?» dissal Eliseo. «Mal àn dite, ma lu ai dismenteât. E je une malatie une vore rare» (Carlo Sgorlon, Prime di sere)
      Sin. ocasionâl , saltuari
   2. che al è in minorance rispiet a altris, che al è une ecezion rispiet ae norme:  ma in chê volte, jerial propit nissun che si ribelave, che al disubidive? Rârs. Ribelâsi al paron al voleve dî ribelâsi a la autoritât, al ordin, a la religjon (Riedo Pup, I furlans e i parons)
      Sin. pôc
   3. fûr dal comun, straordenari:  «To pari al jere un om râr, tu fasis ben a vaîlu» (Alan Brusini, Par stradis lungjis)
      Sin. ecezionâl , famôs , singolâr , straordenari , speciâl
2. adi., av. pôc fis o penç:  il bosc si fâs râr e plui clâr tal ultin toc (Maria Forte, La tiere di Lansing); Bernart al veve la muse ruane di frêt sot de barbe rare e dure (Agnul di Spere, Frêt); cuant che al nevee e i flocs ti fasin denant dai voi come un vêl râr e sutîl (Josef Marchet, Il cjanâl vistût di blanc)
   Sin. clâr , rasclen , srarît
   
   1. che al è avonde lontan di altris elements de stesse sorte:  li lûs rari, picjadi sui cjantons da li cjasi a ninçalein cuant che una bugada di buera a rondalea jù da la Forcja e a si imbusa pa li stradi (Novella Cantarutti, I cjans di not); cuatri gotonis di ploia scomençavin a colâ raris ma pesantis (Federigo Comelli, Il me paîs); o jerin jentrâts tes grandis planuris de Polonie […]. In chês pradariis, cui paisuts rârs, pierdûts e cidins (Pieri Menis, Il «miracul» di un ûf)
      Sin. clâr , rasclen , srarît

Polirematichis e espressions idiomatichis

• a râr loc.av., loc.adi.inv.
• bestie rare loc.s.f.
• da râr loc.av.
• di râr loc.av.

Proverbis:

• al è râr di cjatâ une frute che di cuarp e di cûr e sedi sane dute
• lis visitis raris a son lis plui cjaris
• metimi râr se tu vûs che ti jempli il granâr
• robe rare, robe cjare
• sorc râr al jemple il granâr
• sorc râr al jemple il granâr, sorc fis al impuarìs