Dizionari de Lenghe Furlane

plee¹  /-lè-/  ple|e  [AF]

1. s.f. mudament di forme, di direzion o di inclinazion di une linie o di une superficie:  nol jentrave il paîs tal so spirt, no sintive il so vert, ancje se al jere bondant su dutis lis pleis des culinis (Maria Forte, Cjase di Dalban); su la bocje cumò e à une plee amare (Alan Brusini, Gian Paolo Linda, I forescj)
   Var. pleie¹
   Cfr. zîr , volt¹ , volte
2. s.f. part dal tiessût pleât, pressât cul fier di sopressâ o cusît tant che ornament:  lis pleis dal vistît simpri dretis e stucadis (Maria Forte, Il Bide di Miot); lis sôs cotulis a pleis i cjarinavin lis gjambis co si voltave par lâ jù pes scjalis (Alan Brusini, Gian Paolo Linda, I forescj)
   Sin. rie , plete
   
   1. segn sul tiessût che si forme par câs par un difiet o par une fruçade:  al displeà la vestalie sul jet: e veve pleis fûr di puest, tantis frapis (Pieri Menis, Il «pigjama»)
      Sin. rie , grispe , frape
3. s.f. maniere di petenâ e di fâ stâ i cjavei:  lâ de piruchiere e fâsi fâ tai e plee
4. s.f. (fig.) mût di lâ indenant, maniere di sucedi:  la plee che lis robis a van cjapant a Rome e je clare: lis fuarcis contrariis si slargjin, a cjapin pît ogni dì plui (Josef Marchet, La gnespule malmadure); no si sa mai ce plee che a podaran cjapâ lis robis (Costantino Smaniotto, Co l'amôr al cimie); la robe e pareve lâ indenant cuntune buine plee (Stiefin Morat, Adalt abàs)
   Sin. ande
5. s.f. (fig.) part intime o plui scuindude:  «misteris» che si cjatin dentri lis pleis de vite di ognun di nô e no si puedin spiegâ ni cu la rason ni cu la «sience», al diseve lui (Pieri Menis, Chei di Muraie); par une setemane ognun al cjale il mont cun voli bon e nol va a scrutinâ fin lis pleis dai compuartaments de int par cirî, cjatâ e meti in clâr colpis e difiets (Riedo Pup, Bastarès fâ Nadâl dut l'an); Fidrì Job al ve la fate di cjalâ in dutis lis pleis des sôs pôris, de pôre de muart e de pôre di dut il rest (Agnul di Spere, La pôre di Fidrì Job)