Dizionari de Lenghe Furlane

lassâ fûr    [AF]

1. loc.v. lassâ de bande difûr, no puartâ dentri o ancje no permeti di jentrâ:  il cjan […] al à di vêlu lassât fûr, scrufuiât di cualchi bande a cirî il fresc (Franco Marchetta, Madalene)
   Sin. lassâ difûr
2. loc.v. no sierâ, no cuvierzi, no taponâ:  Vera e jere involuçade intune siarpone che i lassave fûr dome che il nasut e i voi (Gianni Gregoricchio, Îr e doman)
3. loc.v. no cjapâ dentri, no tocjâ, no cjapâ in considerazion:  il regolament aprovât al fronte dome la part dedicade a radios e televisions, ma al lasse fûr cjarte stampade e internet (Carli Pup, Regjon e lenghe furlane: pôc e tart); se o vais a voltâ dutis lis pagjinis che a son stadis scritis sul patî dai oms, dutis, propit dutis, cence lassâ fûr nissune, si inacuarzarês che nissun al è stât bon di dînus il parcè dal nestri patî (Francesc Placerean, La Pasche)
   Sin. lassâ di bande , lassâ in bande
   
   1. no fevelâ, no scrivi, no resonâ e v.i. di cdn. o di alc:  torni un pas indaûr; / o vevi lassât fûr / une cjosse important (Pieri Çorut, Un secjemerindis)
4. loc.v. escludi, no fâ partecipâ:  chel viodisi lassâts fûr des confidencis e dibot ancje da la amicizie, e chê riverence, a dî la veretât, un pôc false e servîl de int, cun lôr, ur pareve dute di masse e ur faseve ancje une ponte di dispiet (Dino Virgili, La aghe da pît la cleve); nissun nol veve vût cûr di lassâlu fûr de clape (Gianni Gregoricchio, La clape)
   Sin. lassâ di bande , parâ di bande , parâ vie , lassâ in bande
5. loc.v. no fâ alc, par vie che si dismenteisi, che no si sa o ancje par sielte:  la ultime cjosse di viodi jere la capele, là che di solit al lavorave fra Bernart. Cualchidun al scomençave a dî che si podeve lassâ fûr di viodi chê capele (Zuan Lurinçon, La Madalene)
   Sin. lassâ di bande , fâ di mancul , lassâ in bande

Components:

• fûr av., prep., inter., adi.inv., s.m.sing.
• lassâ v.tr., v.intr.