Dizionari de Lenghe Furlane

forcje  /fò-/  for|cje  [AF]

1. s.f. imprest de agriculture fat di un mani lunc di len cun insom doi o plui dincj, pal solit di fier, doprât par cjapâ sù fen, paie e v.i., o ancje tant che arme:  Ulive, cu la forcje, e comedà il patùs e e butà une grampe di fen te grepie (Maria Forte, La tiere di Lansing); cu lis forcjis plui di une volte a slontanarin chei di Mogulis vignûts a scuedi bêçs (Stiefin Morat, Microrivoluzions); cjapait in man une forcje di chês che si doprin par spandi ledan (Bepo Marion, Lis predicjis di pre Soputis)
   Cfr. forchet , forcjàs
2. s.f. patibul par picjâ:  "Sì dabon! Sâstu fie ce mistîr che l'è chel [dal cuintribandîr]?" "Disemit mo." "Il prin pas par lâ su le forcje" (Giuseppe Ferdinando del Torre, La fie capriçose e il contrabandîr); "La forcje che ti picji!" al murmuià fra i dincj il famei (Luigi Gortani, Il paîs misteriôs)
   
   1. pene di muart di jessi picjâts:  "Cheste insolence ti costarà la forcje, galiot che no tu sês altri!" (Carli Pup, Tal mieç dal vât)
   2. (fig., ancje scherç.) persone che si compuarte di delincuent, ancje tant che ofese
      Sin. galere , ligjere , canaie , cjamoie , picjât¹ , toc di picjât , fece , galiot
3. s.f. ingjâf tra dôs monts:  dal cuel de forcje ve là jù che si cuche une valade cuiete sblancjade di lune (Josef Cjargnel, La gnot di Sant Cjandit)
   Sin. pas , siele

Polirematichis e espressions idiomatichis

• fâ di pâl e di forcje loc.v.
• fâ di pale e di forcje loc.v.
• fâ la forcje loc.v.
• fâsi la forcje loc.v.

Proverbis:

• trê pâi a fasin la forcje