Dizionari de Lenghe Furlane

picjât¹ pi|cjât [FO]

p.pass., adi. viôt picjâ , viôt picjâsi
Var. impicjât
adi. fissât adalt: a jerin stangjis di salams e di luianiis, di muset, di mule e polmonarie picjadis sù pai trâfs dal sofit neri (Pieri Menis, Il cuader de none)
1. (ancje fig.) adalt, ancje in sospension: i miei dîs di soranel a stentavin avuâi tun sun di cialis picjadis sui pôi di stradis blancjis e cence fin (Alan Brusini, L'odôr de fiere); Min si jere sintût plui che mai tal limbo, scuasit picjât fra cîl e tiere (Franca Mainardis, Aiar di cjase); al voleve viodi la lune picjade tal cîl parsore de Kaiserpfalz (Agnul di Spere, Un cidinôr todesc)
2. (fig.) tacât, cjapât intor di alc: Mirco al veve crodût di deventâ mat, picjât ae sô arme a trai centenârs di colps, a gomitâsi intor, a sintîsi il cûr che i bateve tal cjâf come une piere (Alan Brusini, Par stradis lungjis)
adi. che al è insom di un rilêf, intune posizion erte: in chest paisut [Liussûl] - picjât, fra prât e bosc, sù par une cleve […] - pre Florio al à lassât un bon ricuart de sô gjenerositât (Pieri Menis, La glesiute dai alpins)
Sin. brancât , brincât , cjapât , imbrancât , imbrincât , ingrampât , poiât , tacât
adi., s.m. che, cui che al è stât copât, o che si è copât, leant une cuarde intor dal cuel e lassant che il pês dal cuarp al scjafoi o al rompi il vues dal cuel: o scomençaressi a indagâ sui doi muarts, soredut sul inneât; su la fantate e sui socios dal picjât (Sandri Di Suald, Ah! la provincie); par pôc nol finive picjât di disperazion e di vergogne (Pieri Menis, Chei di Muraie)
adi., s.m. che, cui che al à une vore di debits e nol rive a paiâju: al à volût fâsi la cjase, e cumò al è picjât dai debits (Giulio Andrea Pirona, Ercole Carletti, Giovanni Battista Corgnali, Il Nuovo Pirona)