Dizionari de Lenghe Furlane

fadie  /-ì-/  fa|di|e  [FO]

1. s.f. sfuarç fisic o inteletuâl che al fâs jessi stracs:  no si cjamine ni par tiere, ni sul cret, ma sui lens, sui ramaçs colâts e lâts fraits. Une fadie di chês! (Alan Brusini, I ribei); puar Meni, tante fadie che i costave la Comunion di Pasche, par vie dal dizun di miezegnot incà (Riedo Pup, Meni Elar)
   Sin. impegn , sfuarç
   
   1. il jessi dificil, intrigôs:  lui nol fevelà plui. Al sintive che e jere fadie a fâsi capî (Maria Forte, Cjase di Dalban)
2. s.f. sensazion di jessi strac, par vie dal lavôr fat:  Menie e stave daûr ai lavôrs cence sintî la fadie (Maria Forte, La fie çuete); al jere pôc ce dî, Milie cuant che si meteve, no cognosseve fadie (Pieri Menis, Si disarès che e je inventade)
   Sin. cuete¹ , scuniment , scanade , strache , strachece , stracherie , strachetât , stracure , sfiniment
3. s.f. ativitât che e domande sfuarç fisic e inteletuâl:  so fi al jere pront par scomençâ a frontâ lis primis fadiis sot paron (Roberto Ongaro, Il muc); restade vedue cun cinc fîs, cu lis sôs fadiis ju à nudrîts e mantignûts (Catarine Percude, La mulinarie)
   Sin. lavôr , opare , travai , vore
4. s.f. [TS] tecn. cundizion di un materiâl sometût a une cjame o a un sfuarç sprolungjâts, che al à di rezi in gracie de sô tignince
   Sin. sfuarç
5. s.f. [TS] med. cundizion patologjiche marcade dal mudâ de rese dal organisim o di un so orghin sometût a esercizi masse sprolungjât

Polirematichis e espressions idiomatichis

• a fadie loc.av.
• pocâ la fadie loc.v.
• puçâ la fadie loc.v.

Proverbis:

• a fâi la barbe al mus, si piert timp e fadie
• ce che al ven cence fadie, in pôc timp ancje al va vie
• cul timp e la fadie si madressin i gnespui
• cul timp e la fadie si madurìs la int
• e je une grant fadie a fâ il siôr e cence vê nie
• la plui grande fadie e je di fâje intindi a cui che nol vûl capîle
• no vûl grant fadie a fâ il coion
• ogni fadie e merte premi
• ogni principi al coste fadie