Dizionari de Lenghe Furlane

cuar  /-à-/  cuar  [AF]

1. s.m. formazion di cheratine, di vues o di altri tiessût che e ven fûr dal cjâf di cierts mamifars:  al faseve ancje il cjaradôr, menant modon e cops […] cui siei nemalons che a vevin cierts cuars che a parevin un pâr di buinçs (Pieri Menis, Gno nono); chel che al veve fevelât al restave platât tal cjanton plui scûr de taulade, sot dal trofeu di un cierf cun tant di cuars (Angelo Floramo, Lis Termopilis austriachis che a deventin la Cjaurêt francese)
   Var. cuarn
   
   1. formazion de stesse sorte di chê di cierts personaçs de mitologjie o de tradizion popolâr:  il Mulinarat salvadi […] al jessè dal infier a discjadenâ il maltimp e cu lis sgrifis, cui dincj, cui cuars di diaul al disgramà vie la piere (Dino Virgili, La aghe da pît la cleve)
   2. materiâl che si oten di chês formazions:  un pâr di ocjai grandonons cuntune montadure nere di cuar (Raffaele Serafini, Dree Venier, "Il Mestri e Margarite" di Michail Bulgakov); son dôs puartis di Elisi al liminâr, / la una di colôr blanc, la altra di neri: / la una è di avoli fin, la altra di cuar (Zuan Josef Busiç, La Eneide di Virgjili)
   3. cualsisei formazion che e da fûr dal cjâf di ciertis bestiis:  cai, cai, fâs i cuars, / doi a mi, doi a ti, / ce che al reste / lasse li (Zuan Nazzi Matalon, Ottorino Burelli, Sacheburache)
2. s.m. (fig.) at di infedeltât sessuâl:  la sô femine e veve plui cuars di chei che a son intun caiâr (Igor Londero, Delit in vie del Lavoro); i pandeve che la Malie se intindeve cun Melio e che i faseve cuars su cuars al so om (Meni Ucel, Pensâ mâl)
3. s.m. strument fat cul cuar di nemâl, doprât pal plui come riclam di cjace o di vuere:  di lontan si sintive il cuar dal cocjo che al sunave tai volts (Alan Brusini, Come tai romançs)
4. s.m. [TS] mus. strument a flât fat di un cjanul lunc di leton intorteât plui voltis che al finìs cuntune plere largje:  [i doi moviments] a son scrits par orchestre di cjamare, cun arcs, flâts, cuar, trombe, percussions e pianoforte (Alessio Screm, Lis maraveis dal compositôr Carlo Corazza)
5. s.m. imprest par judâsi a meti lis scarpis
6. s.m. cualsisei robe che e vedi une forme lungje, pleade e a ponte:  i cuars de lune (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   
   1. formazion a spirâl des menadis gnovis di vît, che i covente ae plante par cjapâsi in cualchi supuart:  al judave […] a compagnâ sul fîl di fier i cjâfs [di vît] che no vevin avonde cuars par brincâsi (Maria Forte, Cjase di Dalban)
      Sin. riç¹ , ranculin , gritul
7. s.m. [TS] stor. cjapiel a ponte di ciertis autoritâts
8. s.m. (coloc.) in espressions negativis, nuie:  prometi la lune, par daspò dâ nancje un cuar (Tarcisio Venuti, La cjase di Toni)
   Sin. boro , borse , busignele , cai , dret , fave , ghele , malandrete , nuie , ostie , potigne
   
   1. ancje tant che esclamazion negative:  un cuar!
      Sin. borse , busignele , cai , dret , fave , ghele , malandrete , nuie , ostie , potigne
9. s.m. tal pl., segn di disacuardi, di ofese, di scaramanzie e v.i. fat tirant sù dal pugn il prin dêt e il dêt piçul:  nol sarà mico un mâl di chei bruts, pûr no! Fasìn i cuars! (Alan Brusini, Amîs come prime)

Polirematichis e espressions idiomatichis

• fâ i cuars loc.v.
• jessi sui cuars loc.v.
• lâ in cuars loc.v.
• lipare dal cuar loc.s.f.
• plantâ i cuars loc.v.
• rompi i cuars loc.v.
• rompisi i cuars loc.v.
• sbassâ i cuars loc.v.
• scjaldâsi i cuars loc.v.
• stâ sui cuars loc.v.
• vê sui cuars loc.v.

Proverbis:

• intant che i litighents a tirin la vacje, un pai cuars e un pe code, i avocats a molzin