Dizionari de Lenghe Furlane

criminâl  cri|mi|nâl  [AF]

1. adi. che al compuarte une infrazion grave de leç, che al è un delit, che al à a ce fâ cuntun delit o cui delits:  al jere rivât a fâ une cariere criminâl come nissun altri, metint adun une tristerie nere, sassinaments, robariis e estorsions (Claudio Mattaloni, Sucedût intal 1717)
   Sin. delituôs , criminôs
   
   1. (fig., iperb.) che al è une colpe une vore grande, che al va cuintri des normis civîls, morâls e v.i.:  lis cualitâts umanis di tante zoventût a son stadis soteradis te maniere plui stupide e criminâl (Antoni Beline, A novante agns dal «stragjo inutil» )
2. adi. che al à a ce fâ cu la prevenzion o persecuzion dai delits, cul dirit penâl o cu la magjistrature penâl:  sgarfâ jenfri lis cjartis dai procès criminâi (Angelo Floramo, La cuintristorie de ocupazion veneziane); adun cul poliziot al jere un tâl, in borghês, lunc e sec. Nol tignì a ments il non, ma dome il fat che al jere comissari de brigade criminâl (Fabian Ros, Un piçul particolâr)
3. adi., s.m. che, cui che al à fat un o plui delits:  cui che al lave cuintri la leç, i carabinîrs e la polizie, al jere simpri un criminâl (Carlo Sgorlon, Ombris tal infinît)
   Sin. delincuent , malvivent
   
   1. (fig., iperb.) cui che si compuarte mâl, che al fâs alc che si calcole in cualchi maniere negatîf:  jo le sbalgjarai, ma, pal gno cont, chei che a àn fat plui de tiarce a son ducj criminâi ! E, se no son, a deventin! Intant, fevelìn clâr: parcè studiino? Par no lavorâ! (Riedo Pup, La bolete dal forment)
      Sin. bandît , brigant , ferabut , galiot , manigolt , rem di galere , delincuent , malandret
4. s.m. azion che e va cuintri de justizie e di cdn., fasint ancje dams fisics, ancje causant la muart di cdn.:  "Oh, ce diaul di mussate! / Eh! se la mê [fie] fos tâl, / o fâs un criminâl" (Pieri Çorut, Relazion de Viele); se o vês di dâmi la colpe di un criminâl, volêso dîmi cemût che o ai fat a fâlu? (Roberto Ongaro, Cretevierte)
   Sin. delit
   Cfr. copament , sassinament , omicidi
   
   1. (fig., iperb.) azion calcolade in cualchi maniere negative e grave:  il scjafoiament di un popul, il talpassament dal so jessi, al è un criminâl cuintri dal spirt, un pecjât grandon che al vûl cjastiât (Carlo Sgorlon, Presentazion di Il sît di Diu)
      Sin. barbaritât , delit , infametât , mostrosetât , nefanditât , reitât