Dizionari de Lenghe Furlane

chest  /-è-/  chest  [FO]

1. adi.dim. denant di un sostantîf, par indicâ cdn. o alc dongje, intal spazi o intal timp, a cui che al fevele:  cheste cjase e jere di gno pari, une volte (Carlo Sgorlon, Ombris tal infinît); magari cussì no, ancje chest an la situazion e je sù par jù compagne (Marc Stolf, Bants de Regjon pe culture: errare humanum est, perseverare diabolicum)
   Sin. chel ca , chel chi , chel culì
   Var. achest , chist , chistu , st
   
   1. al pues jessi rinfuarcît cuntun averbi, un adietîf o une frase relative che a van simpri dopo dal non e mai jenfri l'adietîf e il non:  ur ven incuintri inviât un polizai che, alçant i braçs, ur intime: «Alt», ur dîs, «a cheste ore culì no si sune» (Meni Ucel, Sunadis)
      Sin. chel
   2. al pues jessi doprât insiemi cun adietîfs o cun locuzion che a specifichin la direzion, la distance o la sorte di prossimitât tal timp o tal spazi:  i partigjans ju puartin a Lovke intune cjase di chest paîs alì dongje (Ivano Urli, Storie di Min); o vin simpri cirût di fevelâ pal nestri popul. Par chel popul che o fevelarìn ancje chest an che al ven (Francesc Placerean, Di ducj i dons dal Spiritussant, cumò al covente il don dal coragjo)
      Sin. chel ca , chel chi , chel culì
   3. (enf.) al pues vê funzion di possessîf, spec. in rivuart aes parts dal cuarp:  mi visi di un fat, che lu ai viodût cun chescj voi, za cincuante e passe agns (Josef Marchet, Lis predicjis dal muini)
      Sin. chel ca , chel chi , chel culì
2. adi.dim. che al è cussì, che al à carateristichis che a son claris dal contest:  cun chest frêt, un got di vin al fâs propit ben (Tarcisio Venuti, La cjase di Toni)
   Sin. chel ca , chel chi , chel culì , cussì , dal gjenar , di cheste fate
3. pron.dim. par indicâ cdn. o alc dongje a cui che al fevele, intal spazi o intal timp:  ve ca une scjate di libris, e po cjape ancje cheste
   Sin. chel ca , chel chi , chel culì
   
   1. (enf.) a pene dopo dal sostantîf o dal sintagme che al rapresente, ancje in incîs:  art, cheste, che chi di nô e fonde lis sôs lidrîs in ete romane (Oscar Puntel, Mosaic, une art furlane)
      Sin. chel ca , chel chi , chel culì , chel
4. pron.dim. cun valôr neutri, par indicâ un pont, un concet, un alc che al è a pene stât dit o che si è li li par dîlu:  il furlan al à di jessi doprât ancje tant che prodot economic (e chest al varès di jessi tignût in grant cont ancje te suaze di une strategjie turistiche) (Erika Adami, La promozion de lenghe furlane sui mass media); se chest al è un mâl; se al è un mâl che un popul no si lassi çoncjâ lis sôs lidrîs culturâls, che no si lassi dislidrisâ dal so ambient, che al salvi e che al conservi la sô identitât, alore che si fasin indenant chei che a àn coragjo di dîlu (Riedo Pup, I furlans e l'ambient)
   Sin. chel ca , chel chi , chel culì , chel
5. pron.dim. cun sens neutri, spec. tal feminin par esprimi une conclusion, esclamazion, maravee, disdegn e v.i.:  cheste e je la ultime che tu fasis!; e ancje cheste e je lade; cheste po no me spietavi; oh, cheste mo e je biele
   Sin. chel ca , chel chi , chel culì
   
   1. par botis, patafs, e v.i.:  cjape mo cheste!
      Sin. chel ca , chel chi , chel culì
6. adi.dim., pron.dim. in corelazions o cuintriposizions, dispès in confront cun "chel", al pues indicâ chel che al è dome il prin element e no par fuarce chel plui dongje tal timp o tal spazi:  o chest lavôr o chel par me al è istès (Giulio Andrea Pirona, Ercole Carletti, Giovanni Battista Corgnali, Il Nuovo Pirona)

Polirematichis e espressions idiomatichis

• chest ca loc.adi., loc.pron.
• chest chi loc.adi., loc.pron.
• chest culì loc.adi., loc.pron.
• cun dut chest loc.coniun.

Proverbis:

• ancje chest an mâl e po mai plui ben