chel
/-è-/
chel
[FO]
-
adi.dim.
simpri cun daspò il sostantîf che i si riferìs, al segne cdn. o alc lontan tal spazi o tal timp di cui che al fevele; al pues jessi infuarcît o specificât di averbis o locuzions che a van simpri dopo dal sostantîf indicât:
che mi disi, dulà menie chê puarte là? (Fabian Ros, La rambe);
viôt chê machine li in bande e resone, starlocj! (Franco Marchetta, Light my Fire);
viodêso chê cjase di contadin dongje il puint de Manganize? (Catarine Percude, La brût)
Var. achel
-
si pues doprâ, tal puest dal articul definît, prime di sostantîfs che dopo a àn un superlatîf relatîf:
"Ucjute. Udimi a fâ sù la cjase che ti judarai ancje jo a ti!" "Sì jo." E in dôs che ti son, la fasin sù a la svelte. Pene fate, chê plui viele gji da di man al clostri e si siare drenti. "Triste!" a dîs chê ucjute plui pitinine (Dolfo Zorzut, El lôf e li siet ucjutis)
-
al pues indicâ ancje cdn. o alc lontan di cui che al fevele ma dongje di cui che al scolte:
viôt che ti fâs mâl, Gjovanin, fumâ chê sorte di porcarie! (Ivano Urli, Il conducente)
-
al pues vê ancje valôr di indefinît:
"Mi soi intardât… A jerin chei fruts…" (Dino Virgili, Dôs feminis e un frut);
"Po ben, vino di lâ a bevi chel tai?" (Franco Marchetta, Il numar 1089)
-
adi.dim.
soredut riferît a une part dal cuarp o a alc che si à intor, al pues vê valôr di possessîf di seconde o tierce persone:
cjo, jù chês mans, par cui mi âstu cjapade? (Pieri Somede dai Marcs, Un pugn di moscjis);
al jere di vuardie su chê alte e lungje montagne cun chês scarpis un fregul largjis e chel vistît che lu parave pôc dal aiar, voluçât però tune mantele (Checo Tam, Just, cence di)
-
adi.dim.
cun valôr enfatic, sedi par indicâ cdn. o alc di precîs che cdn. o alc di gjeneric o assolût, esemplâr e v.i.:
e dut par chê fete di polente (Riedo Pup, I furlans e la blave);
gnot e dì al fo in vore, Diu lu sa par cetant timp, a sbisiâ in chê benedete sachete, che come une risultive e continuave simpri a butâ (Catarine Percude, Il solt del Signôr);
chel maledet di un timp nol vûl metisi a bon e intant ducj i lavôrs si ingrumin (Pieri Somede dai Marcs, Resurezion a Pontinie);
"Di po, viôt di taponâti ben" "Sì, bon, nol è che al fasi chel frêt"
-
pron.dim.
cdn. o alc o un pont, un concet e v.i. che al è a pene stât dit o che si è li li par dîlu:
la rudine sute no veve lassadis olmis, e chel al jere un ben (Fabian Ros, Un piçul particolâr);
tes stradis di fûr vie al dave une vôs al cjaval e chel al cresseve il pas cuntune batude nete tal cidin (Maria Forte, Il Bulo di Crodio)
-
(enf.)
a pene dopo dal sostantîf o dal sintagme che al rapresente, ancje in incîs:
a jerin robis, chês, che al jere miôr tignî platadis
-
pron.dim.
cdn. o alc lontan di cui che al fevele e di cui che al scolte:
"Ce mont ise chê?" "Chel al è il Curanan";
Cui isal chel che al jere cun te? Cui isal chel che o jeris insiemi sul gno cesâr? (Meni Ucel, Beput)
-
cdn. o alc lontan di cui che al fevele e dongje di cui che al scolte:
"Par plasê che mi dedi trê etos di formadi vecjo" "Vuelie chest ca che al è di Feagne?" "Va ben, che mi dedi chel"
-
pron.dim.
in secuence cuntune relative, al pues indicâ une persone o une robe in gjenerâl, cence un rapuart di lontanance specific cun cui che al fevele e cun cui che al scolte:
Jacum, ogni joibe, nol bandonave Udin e chel che al veve bisugne de sô marcjanzie al saveve indulà cjatâlu (Angelo Covazzi, Il miarli)
Sin. cui
-
cuntun complement di specificazion par indicâ cualchidun che no si cognòs o che no si vûl clamâ par non:
chê dal plan disot;
chel dai contadôrs;
chel des pomis;
voaltris o riscjais di jessi come chel des gjostris, che dopo vendût il biliet no si vise plui a di cui che lu à vendût (Antoni Beline, Sant Jacum, là che al finìs il mont)
-
tal pl., la int, i abitants o lis personis di un ciert lûc, ambient, famee, lavôr, timp e v.i.:
mi fasevin rabie chei di Merêt, che a levin a pescjâ là vie come se a fossin stâts parons lôr (Lucio Perès, A pescje tal suei);
cence dismenteâ - a zontin po chei di Legambiente - lis discjariis, cun tancj implants fûr norme (Redazion Radio Onde Furlane, Legambiente su lis emergjencis ambient);
il so plan al jere chest: un acuardi cun chei di Nearêt, marcjâ cuintri Martignà e fâ une proteste in Comune ducj insiemi (Riedo Pup, Il prin moto);
nô o jerin "chei di Jacuç". Dongje nô, tal curtîl, a jerin "chei di Lauçane", "dal Cuchil" e "di Sclopetin". Denant nô, a jerin "di Mosse". In face, "dal Sclâf". Passâts nô, a vignivin "chei di Malin" (Ivano Urli, Storie di Vera);
cualchidun di chei di vuê al à coragjo di dî che la int di une volte e pative fam ancje parcè che no jere buine di inzegnâsi (Riedo Pup, I furlans e la fam)
-
pron.dim.
in funzion di predicât nominâl, la stesse robe o persone di prime, cun chês stessis carateristichis di prime:
a Breçà il parc nol è plui chel: i cjastinârs, i laris, i teis, i faiârs a son srarîts (Riedo Pup, Vigji Brusin)
Sin. l'istès
, compagn
-
pron.dim.
in costruzions partitivis, cun adietîfs o locuzions adietivâls, al pues ancje indicâ alc di sotintindût o clâr par vie dal contest:
cjocolate di chê nere;
puartinus une butilie di chel bon;
un tango di chei che ti cjapin il cûr, une di chês musichis che ti segnin come une sgrifade (Antescûr, Milonghe)
-
dome enfatic o infuarcitîf, ancje cun elision dal adietîf o de locuzion adietivâl:
al à cjapât une freadure di chês che ti racomandi;
vie pe gnot e vignì jù une neveade di chês (Pieri Menis, Il miracul dal plevan di Trep);
al è un plasê a scoltâlu, al conte di chês storiis
-
in costruzions partitivis che a rezin une consecutive:
a àn vude tante di chê pôre che a àn preferît gjavâsi (Riedo Pup, Oh giornate del nostro riscatto!)
-
ancje in mancjance de consecutive, cun valôr di infuarcitîf:
o vin cjapât tante di chê ploie, cjale…
-
adi.dim., pron.dim.
si dopre di preference, tal puest dal articul definît, devant di "altri":
di une bande al viodeve la cassefuart, di chê altre une puarte (Fabian Ros, La rambe);
lis grandis oparis a son simpri un afaron di beçons là che pôcs a mangjin, cence preocupâsi des consecuencis te vite di chei altris (Angelo Floramo, Cuintristorie dal Nûfcent 2000-2010)
-
si dopre in alternance o in preference cul articul definît devant dai numerâi ordenâi:
un acuist astrûs, un colp di mat par un dotôr in utroque iure, cjatât fûr intun fontego, su di un bancâl di chei ultins (Franco Marchetta, Madalene);
si rivave però a viodi alc di plui par vie che i scûrs dal barcon a jerin sclapâts di cualchi bande e il sufit di chel prin plan al jere plui bas (Carlo Tolazzi, La salamandrie tal fûc);
cuant che il parasit (fonc) al jentre te fuee, lis celulis tocjadis dal fonc e chês primis li ator a muerin (Enrico Peterlunger, Lis varietâts di vît resistentis a lis malatiis);
dome parcè che tai timps plui resints il siamanisim al è documentât in forme vive e ferbinte in Siberie, e simpri in Siberie al è testemoneât miôr, nol vûl dî che là al sedi stât chel prin (Sandri Carrozzo, Difusion, origjin comune, morfologjie)
Polirematichis e espressions idiomatichis
Proverbis:
- al pâr che la sô crôs a sedi la plui grande ma se si cjale chê di chei altris si torne a cjoli sù la sô
