baronade
/-nà-/
ba|ro|na|de
[AF]
-
s.f.
compuartament, azion o afermazion spavalde, insolente e provocatorie, fate cun cussience cuintri de justizie o cuintri des regulis o de autoritât:
che Diu passi parsore des lôr baronadis. E che al sparagni chê sorte di spiei a di chei che son ancjemò di ca! (Josef Cjargnel, La liende di Fondâs)
Sin. fanfaronade
, smafarade
, briconade
, carognade
, malefate
, ribaldarie
-
azion no tant grave, che e va cuintri des regulis, fate soredut di un frut:
cognossude la baronade di Zenco, Toni e Tilio, i plui grancj de scuadre, a van li di Silvio a scusâsi e a domandâi dai colaçs, trops che a 'nd jere, par paiâlu lôr di persone (Meni Ucel, I colaçs);
e pense ae mame e aes baronadis petadis di picinine a rimpinâsi pai orts di chei dongje (Ivano Urli, Storie di Vera)
Sin. bardassade
, baruchele
, briconade
, gjeromete
, berechinade
-
s.f.
azion fate par imbroiâ:
" […] A mi no tu me petis, amigo; jo o soi il Diaul e o sai ad a ments dutis lis tôs baronadis" (Luigi Gortani, Meni Fari);
in dut ce che a fasin o ce che a disin e je sot vie une baronade, e in dut ce che a viodin o che a sintin, a nulin un imbroi (Josef Marchet, Dongje e lontan)
Sin. imbroi
, ingjan
, truc1
, gjeromete
-
s.f.
inteligjence pronte a jessi ancje platade e pôc oneste:
ducj chei trucs par fâ stâ su lis spinis un fantat, ju veve za imparâts e ju doprave cun baronade (Roberto Ongaro, Cretevierte);
bisugne vê la fuarce di cjalâ dut cence parevoi e di pesâ dut cence baronade (Josef Marchet, Lis predicjis dal muini);
par rivuart o par baronade, al stave simpri tun cjanton o un pas daûr di chei altris e al taseve par no comprometisi (Antoni Beline, Pre Pitin)
Sin. astuzie
, inzen
, furbarie
, furbetât