Dizionari de Lenghe Furlane

atîf  a|tîf  [CO, FO, TS]

1. adi. che al fâs, che al lavore, che si impegne:  atîf e galantom in pôc timp al veve fats une vore di aventôrs (Catarine Percude, La mulinarie); in sostance Mirco, ancje se contraditori, al jere un om atîf e positîf (Alan Brusini, Par stradis lungjis); il to om al è ben sfrancjât come fornasîr, e lu fâs dal naturâl come il mangjâ e il respirâ… E al è atîf e, alore, dut al scuen lâ indenant ben (Maria Forte, La tiere di Lansing)
   Sin. dinamic , eficaç , eficient , energjic , laboriôs , lavoradôr , pront , sfadion , sveât , vitâl , vivarôs , zovevul , produtîf , impegnât
   
   1. adi., s.m. che al à une ocupazion, un lavôr, une ativitât professionâl, rispiet a cui che al è disocupât, pensionât e v.i.:  il tierç criteri (grât di ruralitât) al jere il rapuart tra popolazion ative in agriculture e popolazion ative totâl, e al stratificave i comuns in doi grups, seont che i atîfs in agriculture a fossin plui o mancul dal 25% (Linda Picco, Ricercje su la condizion sociolenghistiche dal furlan)
2. adi. plen di ativitâts, impegns, interès:  ognidun di nô al pues cjapâsi cure di se, se al manten une vite ative in dutis lis etâts (Guglielmo Pitzalis, Metiti in moto!)
   Sin. dinamic , vitâl
3. adi. che al à funzion specifiche e determinante intun davuelziment di alc:  des trê «epopeis» talianis dal secul passât il Friûl al cjapà part ative nome ae prime: a chê dal '48 (Josef Marchet, Cuintristorie dal Friûl fin sot la Italie); i docents a favorissin la partecipazion ative dai arlêfs (Patrizia Pavatti, La tutele de lenghe furlane a scuele)
   Sin. produtîf
4. adi. che al è in vore:  i sistemis automatics di sigurece antisismiche a àn studât ducj i reatôrs atîfs, fermant lis reazions di fission (Alessandro Pascolini, Il disastri de centrâl nucleâr di Fukushima Dai-ichi); des 27 radios notadis intal scandai dopo cuasi vincj agns a son ativis juste 3 o 4 (Max Mauro, Un Friûl difarent: i 90 mhz di Onde Furlane)
   Sin. in ativitât , in vore , tacât , inviât
   
   1. vulcanol. di un vulcan, che al è ancjemò in stât di jentrâ in fase di eruzion:  il Vesuvi al è un vulcan atîf
      Sin. in ativitât , in vore
5. adi. [CO, TS] ling. (impropr.) che al à a ce fâ cu la emission dal messaç:  o ai testade la competence ative dai students cuant che o ai scomençât e dome il 20 par cent a savevin fevelâ par furlan. Ae fin dal an ducj a savevin fevelâ e scrivi in marilenghe (Walter Tomada, Pierluigi Cappello: «L’om plui concret? Il poete»); vê la pussibilitât di cjapâ competencis ativis e passivis tal ûs di plui lenghis (Marc Stolf, Minorancis linguistichis)
6. adi., s.m. che, cui che intun rapuart sessuâl al penetre
7. adi. [CO, TS] gram. de forme verbâl, che e esprim la azion fate dal subiet:  la vôs ative e mostre che il sogjet al fâs la azion (Zuan Nazzi Matalon, Marilenghe gramatiche furlane)
   
   1. s.m. forme dal verp che e esprim la azion fate dal subiet
8. adi. [CO, TS] econ. che al da o al regjistre lis jentradis o plui jentradis che jessudis:  cambiament di denominazion in dutis lis puestis ativis (tassazion) e passivis (spese publiche) (Patrizia Tiberi Vipraio, Euro o no euro: isal chest il probleme?)
   
   1. s.m. complès dai bens di une aziende intun moment determinât:  in câs che la societât e passàs i limits di leç sul numar dai socis e sul atîf dal stât patrimoniâl, e varà di jessi clamade daurman la assemblee dai socis par justâ chest statût aes normis su lis societâts par azions (Serling soc. coop., Statût de Serling societât cooperative)
   2. s.m. la sezion dal belanç dulà che a vegnin regjistradis lis ativitâts di une aziende:  titui di stât des bancjis, che ju scrivin tai lôr atîfs (Patrizia Tiberi Vipraio, Euro o no euro: isal chest il probleme?)
   3. s.m. il fat di vê plui jentradis che jessudis:  il Teatri Zuan di Udin al siere i conts in atîf o in paritât (Bepi Agostinis, Compagniis filodramatichis - Sveâsi!! Bisugne reagjî)
9. adi. [TS] chim. di element o sostance, che, in cundizions particolârs, al mostre une reativitât plui intense dal normâl:  i sistemis plui cognossûts pal tratament des aghis refluis a son i procès a pantan atîf (Ilaria Cimarosti, Cristiano Roselli Della Rovere, Daniele Goi, Modei matematics par implants di depurazion: primis aplicazions in Friûl)