Dizionari de Lenghe Furlane

produtîf  pro|du|tîf  [AF]

1. adi. che al à a ce fâ cu la produzion, che al puarte ae realizazion di prodots, che al covente o che al zove par fâ prodots:  la introduzion tal nestri sisteme produtîf di mecanisims di inovazion e di ricercje (Fabian Ros, Forum dai furlans); ne la Europa, una lega a 'ndi alimenta 1200. Eco la diferença tra i fatôrs naturâi, e i fatôrs fecondâts dal on che lavora. Eco la distança che passa fra l'element produtîf e la produzion (Federigo Comelli, Il me paîs)
2. adi. (ancje fig.) di cdn., che al rive a realizâ il so lavôr cun risultâts bogns e in grande cuantitât:  la opare di Renzo Balzan e je sostanziose e e cjape dentri une vore di lengaçs e di formis. Siore la sô produzion leterarie, che lu fâs un dai scritôrs plui produtîfs de Cjargne (Alessio Screm, La stele alpine dal Friûl nus lasse Renzo Balzan, une vôs identitarie)
   
   1. di alc, che al da un prodot bondant:  lis braidis a son produtivis, regolârs, dretis (Max Mauro, Un Friûl difarent: i 90 mhz di Onde Furlane); si è scomençât a plantâ varietâts plui produtivis e a mecanizâ la viticulture in culine (Stefania Garlatti Costa, Dai roncs laboratoris di biodiversitât a nassin vins "rivoluzionaris")
      Sin. bon , fertil
   2. di dade di timp, che e je caraterizade dal fat che si otegnin risultâts, che si crein prodots:  une des stagjons plui creativis e produtivis de art plastiche e pitoriche mondiâl (Fabian Ros, Guggenheim par furlan)
      Sin. bon , profitevul
3. adi. di maniere di fâ, di ativitât, di invistiment o sim., che a dan bogns risultâts o buinis renditis:  i autonomiscj a àn superadis chestis cagneris sentimentâls, a stan cirint un teren plui salt e plui positîf, une forme di convivence pacjifiche e produtive (Josef Marchet, La sgarfade dal cjan)
   Sin. avantazôs , bon , profitevul , rimuneratîf , util , zovevul