Dizionari de Lenghe Furlane

articolazion  /-òn/  ar|ti|co|la|zi|on  [AF]

1. s.f. (ancje fig.) l'articolâ, l'articolâsi e il lôr risultât:  la mozion e je restade un fat episodic, cence consecuencis inte articolazion de azion dal partît (Adrian Cescje, Memoriis di politiche linguistiche)
   
   1. struture o mût di jessi struturât:  la articolazion dal Consei des Siencis e riflet la ripartizion des dissiplinis elencadis inte Somma (Mario Turello, Il brevet)
      Sin. struture , implant , tressadure , telâr
   2. singule part di un complès struturât:  la Republiche taliane, in dutis lis sôs articolazions, no à dome di rindi cont a nivel continentâl di cemût che e spint e che e sparagne […]. I tocje fâsi valutâ ancje in cont di un aspiet di fonde de democrazie (Marc Stolf, Lenghis, dirits, minorancis e tutele. Pal Stât Talian al è timp di esams)
      Sin. part¹ , toc¹
2. s.f. [AF, TS] anat. zone dal cuarp li che si cometin dôs parts rigjidis, che e permet la lôr mobilitât:  une scarpe che ti fâs mâl tai pîts, ti fâs vignî lis vissiis e ti inflame lis articolazions (Christian Romanin, "Viandemecum": istruzions par cjaminâ)
   Sin. comissure
   Cfr. zîr
3. s.f. [TS] ling., fon., med. emission de vôs te forme dal lengaç:  la gjenerazion di peraulis daûr di un indizi al è un compit complès, che al cjape dentri une vore di procès cognitîfs, come la ricercje lessicâl, il recupar lessicâl, e la produzion dai schemis motoris de articolazion (Daniela Perani, Neuroimagjins funzionâls e cerviel bilengâl)