Dizionari de Lenghe Furlane

a plomp    [CO]

1. loc.av., loc.adi.inv. cuntune linie, traietorie, forme o posizion verticâl precise:  e cjaminave drete nancje che e ves il fîl de schene tignût a plomp di une stangje di fiar (Gianni Gregoricchio, Trê feminis); il soreli a plomp al instupidive. A di chê ore la int o che si impisulive tes cjasis o che e polsave ta la ombrene (Pieri Menis, Sflameadis); di gornis nancje inficje; in fat, a plomp de striceade, par tiere, si podeve viodi dute une fasse di gravin blanc, lavât (Roberto Ongaro, Cretevierte)
   Cfr. a scuare
   
   1. cuntune linie drete:  de Cjuie la strade e va jù a plomp cuintri Colorêt (Riedo Pup, Il Crist di Quilin)
      Cfr. dret
2. loc.av., loc.adi.inv. intune situazion in cualchi maniere juste, corete, positive, normâl, buine, preseade, di buine salût, di bon umôr e v.i.:  la Malie, di un pâr di dîs incà, no je a plomp: i zire il cjâf, e sint doloruts jù pe schene (Meni Ucel, Tant parom); nol sarà che Tonin li, puar, nol sarà che… il cjâf… che nol sedi plui tant a plomp ? (Laurin Zuan Nardin, Scampanotâ)
   Sin. a puest , a scuare , pulît , just , ben

Components:

• plomp¹ adi., s.m., s.m.inv., adi.inv.