Dizionari de Lenghe Furlane

plomp¹  /-ò-/  plomp  [FO]

1. adi., s.m. metal une vore pesant e tenar, clâr e slusint a pene lavorât, al devente grîs a contat cul aiar:  becins di plomp e di arint (Alan Brusini, Amîs come prime); al fâs une largje buse tes breis dal cuviert, al tire sù un bandon di plomp, lu plee e al cjale fûr (Pierluigi Visintin, Friûl e furlans te Histoire de ma vie di Giacomo Casanova)
   
   1. [TS] chim. element chimic metalic cul numar atomic 82, simbul Pb:  tal 1953 cualchi fisic e gjeolic a son rivâts a dimostrâ, misurant i isotops dal plomp produsûts tes pieris di bande de radioativitât dal urani naturâl, che la Tiere si formà 4,55 miliarts di agns indaûr (Claudio Tuniz, Evoluzion umane: la sience e mostre i segrets des nestris origjins)
   2. (fig.) in paragons o metaforis par dî alc di pesant, fer, dificil e sim.:  no sai parcè, alc mi ten di jentrâ te stanzie. […] O volarès, ma no pues, o ai lis gjambis di plomp e un sgrisul jù pe schene (Alan Brusini, Gian Paolo Linda, I forescj); la mê e je une fadie di plomp che no comede la vite (Maria Forte, Cjase di Dalban); si jevà sù strache, cul cjâf che i pareve di plomp (Pieri Menis, Chei di Muraie); lâ a durmî adore, la sere, par ripiâsi des fadiis de zornade, cun durmidis di plomp (Meni Ucel, Orazions)
2. s.m.inv., adi.inv. colôr grîs scûr, ancje in locuzions o metaforis:  un cîl di plomp al tignive scuindût il soreli (Gianfranco Pellegrini, Il drâc)
3. s.m. sigjîl fat di chel metal:  par vierzi la casse bisugne rompi i plomps
4. s.m. [TS] tecn. pês di chel metal tacât insom di un fîl par vê un riferiment di linie verticâl:  il grop al svolà par aiar fin sot dai trâfs e po al tornà jù come un plomp (Riedo Pup, Chei di Martrent)
   Sin. plombin
   
   1. (estens.) chel fîl e chel pês insiemi:  al jere partît cun nivel e cul plomp, mighe cu la sclope, che a lui no i lave la sclope (Meni Ucel, Ideis); pai plui inzegnôs [Sante Luzie e puartave] un martiel, une splane; o une cjace di muredôr, un nivel, un plomp; o une seute (Riedo Pup, I furlans e Sante Luzie)
      Sin. fîl a plomp
5. s.m. (fig.) cualsisei robe che e pese:  cuant che lu poiarin sul vert, cul so plomp cence vite, 'Sefut al veve i voi disledrosâts (Maria Forte, Chel svampît di 'Sefut)
   Sin. pês¹
6. s.m. tipogr. leghe che e à dentri chel metal, doprade par fondi i caratars di stampe e par metonimie, ogni caratar o dute la composizion tipografiche fate cun chê leghe:  cetancj cuintâi di plomp antiregjonalist tes rotativis talianis in chescj dîs! (Josef Marchet, La regjon in pericul)
7. s.m. proietil di arme di fûc:  a Cefalonie tancj soldâts talians a vevin pierdude la lôr muse zovine, sot il plomp dai todescs (Maria Forte, Cjase di Dalban); la plui brute Pasche, puar Vergjilio, e fo chê de Russie, cuant che une sborfade di plomp lu seà in pîts, te nêf (Riedo Pup, Vergjilio)
8. s.m. il colâ jù:  a colp un pît in fal, un zigo e un plomp e il scûr de trombe [dal fen] le glotè (Roberto Ongaro, Il muc); cumò chel grop di cuarps al rodole sul arzin, i claps a corin jù saltant fin ta la aghe, e po un plomp: la aghe e sclipignà, si savoltà, si inturbidì (Dino Virgili, La aghe da pît la cleve); Vergjilio lu cjapà [il cjadenaç, par netâlu] pal prin rimpin e lu butà un plomp ta la aghe fonde (Riedo Pup, Vergjilio)
   
   1. [TS] zûcs tal zûc di balis, tîr fat di mût che la bale e resti dulà che e cole, cence rodolâ vie

Polirematichis e espressions idiomatichis

• a plomp loc.av., loc.adi.inv.
• fûr di plomp loc.av., loc.adi.inv.
• fûr plomp loc.av., loc.adi.inv.
• lâ a plomp loc.v.
• lâ cui pîts di plomp loc.v.
• restâ di plomp loc.v.
• vê il cjâf a plomp loc.v.

Proverbis:

• grant il fûs, grant il plomp