Dizionari de Lenghe Furlane

vuere  vue|re  [FO]

1. s.f. conflit militâr, ancje cun iniz. maiusc. te indicazion di un fat storic specific:  la vite i veve fat provâ la vuere cui siei pericui, cul so vivi e murî par dibant, nome par dâ seont a chei cuatri cerviei malâts che le vevin volude (Roberto Ongaro, Il muc); al timp de vuere dal 15, lis feminis chi ator e vignivin a Tresesin a tirâ il sussidi par vie dal om soldât (Alan Brusini, Amîs come prime); al à fate, tai alpins de Julie, la Grecie e la Russie, campagnis tremendis de Ultime Vuere (Ivano Urli, Il conducente)
   Var. guere
2. s.f. (fig.) situazion di contrast ancje dûr ma no armât jenfri grups, societâts, aziendis e v.i.:  dutis lis risorsis, lis fuarcis, il cerviel, i bêçs, i mieçs di ogni cualitât a son lâts straçâts par dibant intune vuere sterpe e stupide fra partîts (Josef Marchet, Preambul rusin)
3. s.f. (fig.) impegn une vore fuart a pro o cuintri di cdn. o di alc:  o ai vinçude la bataie, ma no crôt che e sedi stade decisive par vinci la vuere de salvece de lenghe (Adrian Cescje, Memoriis di politiche linguistiche); la vere reson di cheste vuere da la industrie e dal capitâl cuintri la autonomie, e je la pôre di viodi rotis chês cjadenis di camore (Josef Marchet, La unitât de camore)
   Sin. campagne
   Cfr. bataie
4. s.f. (fig.) conflit interiôr di sintiments, pinsîrs e v.i.:  e jo cu la muse viarte no voi fâ pi l'amôr / e jo che ai la vuere dentri il côr (Mitili FLK, Klostris)
   Sin. bataie , contrast , lote¹ , scuintri

Polirematichis e espressions idiomatichis

• fâ la vuere loc.v.
• fâ vuere loc.v.
• in pît di vuere loc.av., loc.adi.inv.
• lâ in vuere loc.v.

Proverbis:

• adore a marcjât e tart a la vuere
• bêçs a menin vuere
• bisugne lassâ lâ il mâl jù pai malâts e la vuere jù pai soldâts
• cui che al è stât in vuere al po contâlis
• cui che al va in vuere al mangje mâl e al duar par tiere
• cui che al vûl salvâ la panze pai fîcs che nol ledi in vuere
• il bon soldât si lu cognòs in vuere
• il brâf soldât si lu cognòs in vuere
• in timp di vuere di cent une di vere
• in timp di vuere nissune di vere
• in timp di vuere ogni arme e scuse
• in vuere si va cun doi sacs: un par dâlis e un par cjapâlis
• la cjavre che no fasi vuere cul leon
• la cjavre no po fâ vuere cul leon
• la piore no po fâ vuere cul leon
• la vitorie e je nemie de vuere, il scomençâ de pâs
• nol è negozi in tiere che al puarti plui dam de vuere
• par un soldât no lassin di fâ vuere
• une pâs par fuarce e je segrete vuere